Page Text
________________
आचारांग सूत्र - बीओ सुयखंधो
९ से भिक्खू वा भिक्खुणी वा गाहावइकुलं जाव पविढे समाणे से जं पुण पाणगजायं जाणेज्जा, तं जहा
तिलोदगं वा तुसोदगं वा जवोदगं वा आयामं वा सोवीरं वा सुद्धवियडं वा, अण्णयरं वा तहप्पगारं पाणगजायं पुव्वामेव आलोएज्जा-आउसो ! त्ति वा भगिणि! त्ति वा दाहिसि मे एत्तो अण्णयरं पाणगजायं? से सेवं वयंतं परो वएज्जा-आउसंतो समणा! तुमं चेव एयं पाणगजायं पडिग्गहेण वा मत्तएण वा उस्सिंचियाणं ओयत्तियाणं गिण्हाहि । तहप्पगारं पाणगजायं सयं वा णं गेण्हेज्जा, परो
वा से देज्जा, फासुयं जाव पडिगाहेज्जा। १० से भिक्खू वा भिक्खुणी वा गाहावड्कुलं जाव पविढे समाणे से जं पुण पाणगजायं जाणेज्जा
अणंतरहियाए पुढवीए जाव संताणए उद्घट्ट [ओहद्दु] णिक्खित्ते सिया । असंजए भिक्खुपडियाए उदउल्लेण वा ससिणिद्धेण वा सकसाएण वा मत्तेण, सीओदएण वा संभोएत्ता आहट्ट दलएज्जा ।
तहप्पगारं पाणगजायं अफासुयं जाव णो पडिगाहेज्जा । ११ एयं खलु तस्स भिक्खुस्स वा भिक्खुणीए सामग्गियं । जं सव्वद्वेहिं समिए सहिए सया जए | त्ति
बेमि |
|| सत्तमो उद्देसो समत्तो ||
अट्ठमो उद्देसो
१ से भिक्खू वा भिक्खुणी वा गाहावड्कुलं पिंडवाय पडियाए पविढे समाणे से जं पुण पाणगजायं
जाणेज्जा, तं जहा- अंबपाणगं वा अंबाडगपाणगं वा कविठ्ठपाणगं वा माउलिंगपाणगं वा मुद्दियापाणगं वा दाडिमपाणगं वा खज्जूरपाणगं वा णालिएरपाणगं वा करीरपाणगं वा कोलपाणगं वा आमलगपाणगं वा चिंचापाणगं वा अण्णयरं वा तहप्पगारं पाणगजायं सअट्ठियं सकणुयं सबीयगं असंजए भिक्खुपडियाए छब्बेण वा दूसेण वा वालगेण वा आवीलियाण परिपीलियाण परिस्सावियाण आहट्ट
दलएज्जा | तहप्पगारं पाणगजायं अफासुयं जाव णो पडिगाहेज्जा । २ से भिक्खू वा भिक्खुणी वा जाव पविढे समाणे से आगंतारेसु वा आरामागारेसु वा गाहावइकुलेसु वा
परियावसहेसु वा अण्णगंधाणि वा पाणगंधाणि वा सुरभिगंधाणि वा अग्घाय अग्घाय से तत्थ
आसायवडियाए मुच्छिए गिद्धे गढिए अज्झोववण्णे "अहो गंधो, अहो गंधो" णो गंधमाघाएज्जा । ३ | से भिक्खू वा भिक्खुणी वा जाव पविढे समाणे से जं पुण जाणेज्जा- सालुयं वा विरालियं वा
सासवणालियं वा, अण्णयरं वा तहप्पगारं आमं असत्थपरिणयं अफासुयं जाव णो पडिगाहेज्जा । ४ से भिक्खू वा भिक्खुणी वा जाव पविढे समाणे से जं पण जाणेज्जा- पिप्पलिं वा पिप्पलिचण्णं वा
मिरियं वा मिरियचुण्णं वा सिंगबेरं वा सिंगबेरचुण्णं वा, अण्णयरं वा तहप्पगारं आमं असत्थपरिणयं
अफासुयं जाव णो पडिगाहेज्जा। ५ से भिक्खू वा भिक्खुणी वा जाव पविढे समाणे से जं पुण पलंबजायं जाणेज्जा, तं जहा- अंबपलंब
वा, अंबाडगपलंबं वा, तालपलंबं वा, झिज्झिरिपलंबं वा सुरभिपलंबं वा सल्लइपलंबं वा, अण्णयरं वा तहप्पगारं पलंबजायं आमं असत्थपरिणयं अफासुयं जाव णो पडिगाहेज्जा |
| SR No. | 009901 |
| Book Title | Agam 01 Ang 01 Acharanga Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 116 |
| Language | Prakrit |
| Classification | Book_Devnagari, Agam, Canon, & agam_acharang |
| File Size | 4 MB |