Page Text
________________
आचारांग सूत्र - पढमो सुयखंधो
बीओ उद्देसो
१ | आउरं लोगमायाए चइत्ता पुव्वसंजोगं, हिच्चा उवसमं, वसित्ता बंभचेरंसि | वसु वा अणुवसु वा
जाणित्तु धम्मं अहा तहा। अहेगे तमचाइ कुसीला वत्थं पडिग्गहं कंबलं पायपुंछणं विउसिज्ज अणुपुव्वेण अणहियासेमाणा परीसहे दुरहियासए कामे ममायमाणस्स इयाणिं वा मुहत्तेण वा अपरिमाणाए भेए । एवं से अंतराइएहिं कामेहिं आकेवलिएहिं, अविइण्णा चेए | अहेगे धम्ममायाय आयाणप्पभिइसु पणिहिए चरे अप्पलीयमाणे दढे | सव्वं गिद्धिं परिण्णाय | एस पणए महामुणी। अइयच्च सव्वओ संगं ण महं अत्थि त्ति, इति एगो अहमंसि जयमाणे, एत्थ विरए अणगारे सव्वओ मुंडे रीयंते जे अचेले परिवुसिए संचिक्खड़ ओमोयरियाए । से आकुट्टे वा हए वा लूसिए वा पलियं पकत्थ अदुवा पकत्थ अतहेहिं सद्दफासेहिं इति संखाए एगयरे अण्णयरे अभिण्णाय तितिक्खमाणे परिव्वए जे य हिरी जे य अहिरीमणा ।
४ चिच्चा सव्वं विसोत्तियं फासं संफासे समियदंसणे । एते भो णगिणा वुत्ता जे लोगंसि
अणागमणधम्मिणो ।
आणाए मामगं धम्मं, स उत्तरवादे इह माणवाणं वियाहिए। एत्थोवरए तं झोसमाणे आयाणिज्जं परिणाय परियारण विगिचड़ । इहमेगेसिं एगचरिया होइ । तत्थियराइयरेहिं कुलेहिं सुद्धसणाए सव्वेसणाए से मेहावी परिव्वए सुब्भिं अदुवा दुन्भिं । अदुवा तत्थ भेरवा पाणा पाणे किलेसंति। ते फासे पुट्ठो धीरे अहियासेज्जासि । त्ति बेमि ।
|| बिइओ उद्देसो समत्तो ||
तइओ उद्देसो
एयं खु मुणी आयाणं सया सुअक्खायधम्मे विधूतकप्पे णिज्झो- सइत्ता । जे अचेले परिवुसिए तस्स णं भिक्खुस्स णो एवं भवइ- परिजुण्णे मे वत्थे, वत्थं जाइस्सामि, सुत्तं जाइस्सामि, सूई जाइस्सामि, संधिस्सामि, सीविस्सामि, उक्कसिस्सामि, वोक्कसिस्सामि, परिहिस्सामि, पाउणिस्सामि | अदुवा तत्थ परक्कमंतं भुज्जो अचेलं तणफासा फुसंति, सीयफासा फुसंति तेउफासा फुसंति, दंसमसगफासा फुसंति, एगयरे अण्णयरे विरूवरूवे फासे अहियासेइ । अचेले लाघवं आगममाणे, तवे से अभिसमण्णागए भवइ । जहेयं भगवया पवेइयं । तमेव अभिसमेच्चा सव्वओ सव्वत्ताए सम्मत्तमेव समभिजाणिज्जा। एवं तेसिं महावीराणं चिरराइं पुव्वाइं वासाइं रीयमाणाणं दवियाणं पास अहियासियं । आगयपण्णाणाणं किसा बाहा भवंति, पयणुए य मंससोणिए । विस्सेणिं कट्ट परिण्णाय, एस तिण्णे
मुत्ते विरए वियाहिए। त्ति बेमि । ४ विरयं भिक्खू रीयंतं चिरराओसियं अरई तत्थ किं विधारए ? संधेमाणे समुट्ठिए । जहा से दीवे
असंदीणे एवं से धम्मे आरियपदेसिए | ते अणवकंखमाणा अणइवाएमाणा दइया मेहाविणो पंडिया |
23
| SR No. | 009901 |
| Book Title | Agam 01 Ang 01 Acharanga Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 116 |
| Language | Prakrit |
| Classification | Book_Devnagari, Agam, Canon, & agam_acharang |
| File Size | 4 MB |