Page Text
________________
[७९]
एत्तियकालं नन वंचिओऽम्हि जं सेविओ न से धम्मो ।
एहि पि समणधम्मं, करेमि एयाणमाणाए । एवं च वेरग्गमग्गावडिएणुप्पाडियं केवलनाणं । संपत्ता देवया । भणियं च णाए – 'पडिवज्जसु दव्वलिंगं जेण वंदामि' । पडिवण्णे य दव्वलिंगे वंदिओ देवयाए । पत्तो तियसरइयं समोसरणं । निसण्णो तत्थ इलापुत्तकेवली । पणमिओ भावसारं सुरासुरनरिंदाईहिं । परूविओ धम्मो । छिण्णा संसया । तओ विम्हियमणाए पुच्छियं परिसाए – 'कहिं पुण एयाए उवरि ते एरिसो रागो जाओ ?' साहिओ य णाए अप्पणो य पुव्वभवजणिओ भज्जोवइयवइयरो । तं च निसा[मि]ऊण भावंतीए जाईसरणपुव्वयं समुप्पण्णं तीए वि केवलं । तओ रण्णो महादेवीए य । एवं च ते चउरो वि केवलिणो जाया सिद्धा य कुरुचंदाइय त्ति । इलापुत्तो त्ति गयं ॥
कुरुचंदाइकहा भण्णइ -
अत्थि कोसलाविसए सिरिउरं नाम नयरं । तत्थ चत्तारि वणियउत्ता । तं जहा - सुधणो, धणवई, धणेसरो, धणदो य । एए पयइभद्दगा वयंसा य । पयट्टा अत्थजत्ताए र[य]णदीवं, दोणगो नामेसिं कम्मयरो संबलवाहगो य । अण्णया महाडवीए गहियसंबला वच्चंति । खीणपायं च तमेएसिं उत्तिण्णप्पायाए अडवीए । एत्थंतरे दिट्ठो णेहिं पडिमापडिवन्नगो साहू । जाया एएसिं सद्धा । चिंतियं च णेहिं – 'देमो किं पि एयस्स, अणुग्गहेमो अत्ताणयं । गोयरसमओ य रिसिणो । पयट्टो सो रिसी । भणिओ सुधणाईहिं दोणगो – 'भद्द ! दोणग ! देहि किंपि एयस्स' । तेहिंतो अहिगसद्धाभावेण य पडिलाभिओ रिसी तेण । निव्वत्तियं महाभोगफलं । पत्ता रयणदीवं समासाइओ इट्ठलाभो । आगया सदेसे । तेणेव पुण्णबीजेण नंदिया सव्वकालं । किंतु किंचिमायाविणो धणवइ-धणेसरा ववहरंति सुहुममायाए । दोणगो अहिअं सुद्धवित्तीए।
एवमइक्कतो अहाउयकालो । मओ पढममेव दोणगो । उप्पण्णो कुरुविसए गयउरे नगरे दुप्पसहस्स रण्णो सिरिसुंदरीए देवीए कुच्छिसि पुत्तत्ताए । दिट्ठो य णाए सुविणगे तीए चेव रयणीए वयणेणोदरं पविसमाणो चंदो । साहिओ भत्तारस्स । 'कुरुचंदो ते पुत्तो भविस्सइ'त्ति जंपियमणेण । परितुट्ठा देवी । पसूया कालक्कमेण । जाओ दारगो । पइट्ठावियं च से नामं कुरुचंदो त्ति ।
एत्थंतरे मया सुधण-धणया । समुप्पण्णा वाणियपुत्ता । एगो कंपिल्लनगरे, अण्णो कत्तियउरे । पइट्ठावियाइं नामाइं - एगस्स वसंतदेवो अण्णस्स कामपालो । एत्थंतरे मया धणवइ-धणेसरा । समुप्पण्णा वाणियदुहियत्तणेण । एगा संखउरे अण्णा जयंतीए । पइट्ठावियाइं नामाइं - एगी(गा)ए मइरा, अवराए केसरा । एवमइक्कंतो कोइ कालो । पत्ताणि जोव्वणं।
अण्णया कंपिल्लाओ संववहारवडियाए महया भंडनिवहेण गओ वसंतदेवो जयंतिं । ठिओ कइ वि दियहे । विणिविहियपायं च भंडं । इत्थंतरे अट्ठमीचंदगमहे दिट्ठा एएण रइनंदणे उज्जाणे विग्गहवई विव रई केसरा । पुव्वभवब्भासेण य सिणेहसारं मिलिया दिट्ठी । 'का एस'त्ति पुच्छिओ जयंतिवत्थव्वगो संजायमित्तभावो पियंकरो नाम वाणियगपुत्तो । तेण साहियं – “एसा खु पंचनंदिणो धूया जयंतिदेवस्स भगिणी केसरा नाम कण्णगा' ।
कया वसंतदेवेण जयंतिदेवेण सह मित्ती । तओ निमंतिओ सबहुमाणमेसो तेणाऽवि । दिट्ठा एएण
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |