________________
३२२]
[ऋषिदत्ताचरित्रसंग्रहः ॥ धम्मामयतित्तमणा दूरं परिचत्तविसमविसयतिसा । वज्जियपरिणयणकहा चिड़ सा धम्मगयबद्धी ॥५२४॥ अवरा वि तत्थ एगा संगा नामेण साविया अस्थि । दारिद्दभरक्कंता निक्खंता साहुणिसयासे ॥५२५॥ सा कुणइ तवं उग्गं वयमाहप्पेण पूयए लोगो । रायसुया वि हु तप्पइ किं पि तवं अंबिलाईयं ॥५२६॥ नवरं न को वि वन्नं कुणइ गिहत्थ त्ति काउमेईए। तत्तो सा निवधूया मच्छरमुव्वहइ संगाए ॥५२७॥ भणइ य एसा वइणी रयणीए बलेण खाइ मडयाणि । ताहे सव्वो वि जणो पत्तिन्तो रायधूयाए ॥५२८॥ सा वि हु सकयफलमिमं ति सम्ममहियासए विवेयवसा । तीए तं पुण कम्मं बद्धमभक्खाणसंजणियं ॥५२९॥ भमिऊणं संसारे दुहपउरे एत्थ चेव गंगउरे । जाया नरिंदतणया पत्तो जिणदेसिओ धम्मो ॥५३०॥ गहिऊणं पव्वज्जं तवोविहाणं समायमायरइ । तो मायाणुट्ठाणं अब्भक्खाणं च संगाए ॥५३१॥ सुगुरूणमणालोइय नरिंदधूया तहेव य ससल्ला । मरिऊणमग्गमहिसी ईसाणिंदस्स संजाया ॥५३२॥ तत्तो चविउं जाया तुममेसा इहभवम्मि रिसिदत्ता । इय सुणिउं नियचरियं जाईसरणेण संबुद्धा ॥५३३॥ चलणेसु निवडिऊणं गुरुणो संजायगरुयसंवेगा। भणइ गुरुं भयवमिमं सव्वं सच्चं भणह तुब्भे ॥५३४॥ रायाई सयलजणो विम्हइओ निसुणिऊण गुरुभणियं । रिसिदत्ताए चरियं जाओ दुच्चरियभयभीओ ॥५३५॥ कणगरहो वि य राया रज्जे अभिसिंचिऊण सीहरहं । महया विच्छड्डेणं कारविय जिणिंदपूयाओ ॥५३६॥ सिबियाए समारूढो कुणमाणो सासणुन्नइं परमं । सकलत्तो निक्खंतो विहिणा गुरुपायमूलम्मि ॥५३७॥ अब्भसियदुविहसिक्खो तवसा संखवियघाइकम्मंसो । उप्पन्नविमलनाणो वियाणियासेसनायव्वो ॥५३८॥ केवलिपरियायं पालिऊण पडिबोहिऊण भवियजणं । सासयसोक्खे मोक्खे संपत्तो सह कलत्तेण ॥५३९॥
ऋषिदत्ताऽऽख्यानकं समाप्तम् ॥
D:\chandan/new/datta-p/pm5\2nd proof
