________________
सङ्घगुरुकार्ये शक्तिप्रकटने विष्णुकुमारकथा ]
[२३५ भणियं-'जइ एवं, ता पट्टणे चाओ, उज्जाणे च्चिय ठायतु । तओ संजायामरिसेण भणियं नमुइणा-'किमेत्थ पुणरुत्तो ? चिट्ठउ ताव नगरमुज्जाणं वा, मम रज्जे वि सव्वपासंडाहमेहिं निम्मज्जाएहिं गयलज्जेहिं वेयाइदूसएहिं न ठायव्वं । ता तुरियं मम रज्जं मुयह, जइ जीविएण कज्जं' । तओ समुप्पण्णकोवानलेण भणियं विण्हुसाहुणा'तहा वि तिण्ह पयाणं ठाणं देसु' । तओ भणियमणेण-'एवं ता जइ तिण्ह 5 पयाणमुवरि पेच्छिस्सामो तमवस्सं लुयसीसं करेस्सामो' । तओ समुप्पण्णदारुणकोवानलो वड्विउं पयट्टो त्ति । अवि य
कत्थइ कयंतसरिसो, संतावियसयलतिहुयणाभोगो । कत्थइ तरुणरविणिभो, निण्णासियतिमिरनिउरंबो ।। कत्थइ चंदसरिच्छो, नियकरपडिवन्नमहिहराभोगो। कत्थइ सुरिंदसरिसो, विउरुव्वियलोयणसहस्सो ।। कत्थ य पलयहरिसमो, उम्मूलियगिरिगणाभोगो। कत्थइ तिणयणसरिसो, खणमेक्कं सीसठियचंदो ।। कत्थ य मयणसरिच्छो, नियरूवावयवतुलियजियलोगो । कत्थइ फुरंतचक्को संगामे भरहनाहो व्व ।। किरीडी कुंडली माली दिव्वरुई महज्जुई । धणुवाणी वज्जपाणी य दिव्वखग्गी महाबली ।। इय नाणाविहरूवो वडतो सो कमेण मेर(रु)समो । जाओ जोयणलक्खो सुवन्नवररयणसोहिल्लो । उच्छलिया जलनिहिणो रंगंततरंगमच्छपडहत्था । भयवेविरतरलच्छा दिसागइंदा विओ नद्धा(ट्ठा) । महुमत्तकामिणी विव पयंपिया दीवकाणणसमेया । वसुहा पडियडहुत्तं सरिया संपट्ठिया सव्वा ।। फुडिया गिरिणो सव्वे जोइसचकं पि विहडियं दूरं । खुद्धा वणयरदेवा समयं चिय भवणवासीहिं ।।
D:\mala.pm512nd proof
