________________
१३२]
[सविवरणं धर्मोपदेशमालाप्रकरणम् आयावुज्जोयविहायगई य तसथावराभिहाणं च । बायरसुहुमं च पुणो पज्जत्तं तह य अपज्जत्तं ॥ पत्तेयं साहारणं थिरमथिरसुभासुभं च नायव्वं । सुभगदूभगणामं सूसर तह दूसरं चेव ॥ आइज्जमणाइज्जं जसकित्तीणाममयसकित्तिं च । णिम्माणनाममउलं चरिमं तित्थयरनामं च ॥ गोयं च दुविहभेयं उच्चागोयं तहेव णीयं च । चरिमं पंचपयारं समासओ तं पवक्खामि ॥ अह दाण-लाभ-भोगोपभोग-विरियंतराइयं जाण । चित्तं पोग्गलरूवं विन्नेयं सव्वमेवेयं ॥ एगपरिणामपरिसंठियस्स उक्कोसिया जहन्नायं । सव्वस्स वि होइ ठिई भणिमो कम्मस्स तं सुणसु ॥ आइल्लाणं तिण्हं चरिमस्स य तीस कोडिकोडीओ। इअराण मोहणिज्जस्स सत्तरी होइ विन्नेया ॥ णामस्स य गोयस्स य वीसं उक्कोसिया ठिई भणिया। तित्तीससागराई परमा आउस्स बोधव्वा ॥ वेयणियस्स जहन्ना बारस नामस्स अट्ठ उ मुहुत्ता। सेसाण जहन्नठिई भिन्नमुहुत्तं विणिद्दिट्ठा ॥ अट्टविहं पि य कम्मं संसारनिबंधणं तु एयम्मि । खीणे लहंति मोक्खं खमणोवाओ इमो तस्स ॥ दंसणनाणचरित्ताणि खवणहेऊणि दंसणं तिविहं । खइयं खओवसमियं उवसमियमिह समासेणं ॥ आभिणिबोहियनाणं सुयनाणं चेव ओहिनाणं च । तह मणपज्जवनाणं केवलनाणं च पंचमयं ॥
20
१. ज. उ। २. ह. क. वास ।
D:\mala.pm5\2nd proof
