________________
प्रथमम्
। विशेषावश्यकभाष्यगतमङ्गलवादः ॥
बहुविग्घाई सेयाई तेण कयमंगलोवयारेहिं । घेत्तव्वो सो सुमहानिहि ब्व जह वा महाविज्जा ॥१२।। तं मंगलमाईए मज्झे पज्जंतए य सत्थस्स । पढमं सत्थत्थाऽविग्घपारगमणाय निद्दिटुं ॥१३।। तस्सेव य थेज्जत्थं मज्झिमयं अंतिम पि तस्सेव । अव्वोच्छित्तिनिमित्तं सिस्सपसिस्साइवंसस्स ।।१४।। मंगलकरणा सत्थं न मंगलं, अह च मंगलस्सावि । मंगलमओऽणवत्था न मंगलममंगलत्ता वा ॥१५।। सत्थऽत्थंतरभूयम्मि मंगले होज्ज कप्पणा एसा । सत्थम्मि मंगले किं अमंगलं काऽणवत्था वा ? ।।१६।। अत्यंतरेऽवि सइ मंगलम्मि नामंगला ऽणवत्थाओ । सपराणुग्गहकारिं पईव इव मंगलं जम्हा ॥१७।। मंगलतियंतरालं न मंगलमिहऽत्थओ पसत्तं ते । जइ वा सव्वं सत्थं मंगलमिह किं तियग्गहणं ? ॥१८।। सत्थे तिहा विहत्ते तदंतरालपरिकप्पणं कत्तो ? । सव्वं च निज्जरत्थं सत्थमओऽमंगलमजुत्तं ॥१९।। जइ मंगलं सयं चिय सत्थं तो किमिह मंगलग्गहणं ? । सीसमइमंगलपरिग्गहत्थमेत्तं तदभिहाणं ।।२०।। इह मंगलंपि मंगलबुद्धीए मंगलं जहा साहू । मंगलतियबुद्धिपरिग्गहे वि नणु कारणं भणिअं ॥२१।। मंगिज्जएऽधिगम्मइ जेण हिअं तेण मंगलं होइ । अहवा मंगो धम्मो तं लाइ तयं समादत्ते ।।२२।।
