________________
ਸ਼ੀਲ ਕੁਲਕਮ
ਸੁਭਾਗ ਪ੍ਰਦਾਨ ਕਰਨ ਵਾਲੇ ਜਿੰਨੇਦਰ ਨੈਮਿਨਾਥ ਦੇ ਚਰਨਾ ਵਿੱਚ ਮੈਂ ਬੰਦਨਾ ਕਰਦਾ ਹਾਂ। ਜਿਨ੍ਹਾਂ ਨੇ ਬਚਪਨ ਵਿੱਚ ਹੀ ਆਪਣੇ ਬਾਹੂਬਲ ਨਾਲ ਜਨਾਰਦਨ ਸ਼੍ਰੀ ਕ੍ਰਿਸ਼ਨ ਨੂੰ ਵੀ ਜਿੱਤ ਲਿਆ ਸੀ। || 1 ||
ਪ੍ਰਾਣੀਆਂ ਦੇ ਲਈ ਸ਼ੀਲ ਹੀ ਉੱਤਮ ਧਨ ਅਤੇ ਸ਼ੀਲ ਹੀ ਪਰਮ ਮੰਗਲ ਦਾ ਕਾਰਨ ਹੈ। ਸ਼ੀਲ ਦੁਰਭਾਗ ਨੂੰ ਮਿਟਾਉਣ ਵਾਲਾ ਅਤੇ ਸੁੱਖ ਦੇਣ ਵਿੱਚ ਮਾਂ ਦਾ ਸਥਾਨ ਰੱਖਦਾ ਹੈ। ਸ਼ੀਲ ਧਰਮ ਦਾ ਫਲ ਹੈ ਕਿਉਂਕਿ ਜਿਥੇ ਸ਼ੀਲ ਹੈ ਉੱਥੇ ਧਰਮ ਦੇ ਭਿੰਨ ਭਿੰਨ ਗੁਣ ਰਹਿੰਦੇ ਹਨ। ਸ਼ੀਲ ਪਾਪ ਨੂੰ ਖੰਡਤ ਕਰਨ ਵਾਲਾ ਹੈ। ਸ਼ੀਲ ਪ੍ਰਾਣੀਆਂ ਦਾ ਸੰਸਾਰ ਵਿੱਚ ਸ੍ਰੇਸ਼ਟ ਅਤੇ ਪਹਿਲਾ ਗਹਿਣਾ ਹੈ। ॥2-3॥
ਨਰਕ ਦੇ ਦਰਵਾਜੇ ਬੰਦ ਕਰਨ ਲਈ ਸ਼ੀਲ ਦਰਵਾਜੇ ਦੀ ਜੋੜੀ ਦੀ ਤਰ੍ਹਾਂ ਹੈ ਅਤੇ ਸਵਰਗਾਂ ਦੇ ਚਿੱਟੇ ਮਹਿਲ ‘ਤੇ ਚੜ੍ਹਨ ਲਈ ਉੱਤਮ ਪੌੜੀ ਹੈ। ॥4॥ ਮਹਾਰਾਜਾ ਅਗਰਸੈਨ ਦੀ ਪੁੱਤਰੀ ਰਾਜਮਤੀ ਨੇ, ਇਸੇ ਸ਼ੀਲ ਦੇ ਪ੍ਰਭਾਵ ਕਾਰਨ ਸ਼ੀਲਵਤੀ ਸਤੀਆਂ ਵਿੱਚ ਸਥਾਨ ਪਾਇਆ। ਉਸ ਨੇ ਰੇਵਤਾਚਲ ਪਰਵਤ ‘ਤੇ ਚੜ੍ਹਦੇ ਸਮੇਂ ਰਾਹ ਵਿੱਚ ਪੈਂਦੀ ਗੁਫਾ ਵਿੱਚ ਠਹਿਰੇ ਮੁਨੀ ਰਥਨੇਮਿ ਨੂੰ ਸੰਜਮ ਵਿੱਚ ਸਥਿਰ ਕੀਤਾ। ॥5॥ ਭਿਅੰਕਰ ਲਪਟਾਂ ਵਾਲੀ ਅੱਗ ਵਿੱਚ ਵੀ ਜਿਸ ਮਹਾਸਤੀ ਦੇ ਸ਼ੀਲ ਕਾਰਨ ਅੱਗ ਵੀ ਪਾਣੀ ਹੋ ਗਈ। ਉਸ ਰਾਮ ਪਤਨੀ ਸੀਤਾ ਦੀ ਸੰਸਾਰ ਵਿੱਚ ਜੈ ਜੈ ਕਾਰ ਹੋਈ ਜਿਸ ਦੀ ਕੀਰਤੀ ਦਾ ਝੰਡਾ ਅੱਜ ਵੀ ਸੰਸਾਰ ਵਿੱਚ ਲਹਿਰਾ ਰਿਹਾ ਹੈ। ॥6॥
ਛਾਲਣੀ ਵਿੱਚ ਪਾਣੀ ਭਰ ਕੇ ਜਿਸ ਨੇ ਚੰਪਾ ਨਗਰੀ ਦੇ ਦਰਵਾਜੇ ਖੋਲ ਦਿਤੇ, ਉਸ ਸਤੀ ਸੁਭਦਰਾ ਦਾ ਨਿਰਮਲ ਚਰਿਤਰ ਕਿਸ ਦਾ ਚਿੱਤ ਨਹੀਂ ਮੋਹੇਗਾ? ॥7॥
[36]
