________________
परिशिष्ट १
जरकाससाससोसाइपरिगयं पेच्छिऊण घरसामिं। जायाजणणिप्पमुहं, पासगयं झूरइ कुटुंबं ॥ २७॥ न विरिंचइ पुण दुक्खं, सरणं ताणं च न हवइ खणं पि। वियणाओं तस्स देहे, नवरं वड्ढंति अहियाओ॥२८॥ बहुसयणाण अणाहाण वा वि निरुवायवाहिविहुराणं। दुण्हं पि निव्विसेसा, असरणया विलवमाणाणं॥२९॥ विहवीण दरिद्दाण य, सकम्मसंजणियरोयतवियाणं । कंदंताण सदुक्खं, को णु विसेसो असरणत्ते ?॥३०॥ तह रज्जं तह विहवो, तह चउरंगं बलं तहा सयणा । कोसंबिपुरीराया, न रक्खिओ तह वि रोगाणं ॥ ३१॥ सविलासजोव्वणभरे, वट्टंतो मुणइ तणसमं भुवणं। पेच्छइ न उच्छरंतं, जराबलं जोव्वणदुमग्गिं॥३२॥ नवनवविलाससंपत्तिसुत्थियं जोव्वणं वहंतस्स। चित्ते वि न वसइ इमं, थेवंतरमेव जरसेन्नं॥३३॥ अह अन्नदिणे पलियच्छलेण होऊण कण्णमूलम्मि। धम्मं कुणसु त्ति कहंतियव्व निवडेइ जरधाडी॥३४॥ निवडंती य न एसा, रक्खिज्जइ चक्किणो वि सेन्नेण ।
पुण न हुंति सरणं, धणधन्नाईणि किं चोज्जं ? ॥३५॥ वलिपलियदुरवलोयं, गलंतनयणं घुलंतमुहलालं। रमणीयणहसणिज्जं, एइ असरणस्स वुड्ढत्तं ॥ ३६॥ जरइंदयालिणीए, का वि हयासाइ असरिसा सत्ती । कसिणा वि कुणइ केसा, मालइकुसुमेहिं अविसेसा॥३७॥ दलइ बलं गलइ सुइं, पाडइ दसणे निरुंभए दिट्ठि। जररक्खसी बलीण वि, भंजइ पिट्ठि पि सुसिलिट्टं ॥ ३८॥ सयणपराभवसुन्नत्तवाउसिंभाइयं जरासेन्न ।
गुरुयाणं पि हु बलमाणखंडणं कुणइ वुड्ढत्ते॥३९॥ जरभीया य वराया, सेवंति रसायणाइकिरियाओ। गोवंति पलियवलिगंडकूवे नियजम्ममाईणि॥४०॥
१५५
