________________
પ્રથમ નમું ગુરૂ રાજને
પ્રથમ નમું ગુરુ રાજને, જેણે આપ્યું જ્ઞાન; જ્ઞાને વીરને ઓળખ્યા, ટળ્યું દેહ અભિમાન. ૧ તે કારણ ગુરુ રાજને, પ્રણમું વારંવાર; કૃપા કરી મુજ ઉપરે, રાખો ચરણ મોઝાર. ૨ પંચમ કાળે તું મલ્યો, આત્મ રત્ન દાતાર; કારજ સાર્યા માહરાં, ભવ્ય જીવ હિતકાર, ૩ અહો ! ઉપકાર તુમારડો, સંભારું દિન રાત; આવે નયણે નીર બહુ, સાંભળતા અવદાત, ૪ અનંત કાળ હું આથડયો,ન મલ્યા ગુરુ શુદ્ધ સંત; દુષમ કાળે તું મલ્યો, રાજ નામ ભગવંત. ૫ રાજ રાજ સૌ કો કહે, વિરલા જાણે ભેદ, જે જન જાણે ભેદ છે, તે કરશે ભવ છેદ. ૬ અપૂર્વ વાણી તાહરી, અમૃત સરખી સાર; વળી તુજ મુદ્રા અપૂર્વ છે, ગુણગણ રત્ન ભંડાર. ૭ તુજ મુદ્રા તુજ વાણીને, આદરે સમ્યક વંત; નહીં બીજાનો આશરો, એ ગુહ્ય જાણે સંત. ૮ બાહ્યાચરણ સુસંતના, ટાળે જનનાં પાપ; અંતર ચારિત્ર ગુરુરાજનું, ભાંગે ભવ સંતાપ. ૯