________________
સમાધિ મરણ
૫૩
બીજા સમુદાય પ્રત્યેનો બહુમાન ભાવ દૂર કરાવેલ હોય, પ્રભુ શાસનના રાગી બનાવવાને બદલે મારા કે મારા સમુદાયના રાગી બનાવેલ હોય તેની માફી માંગું
છું.
પ્રભુએ એક જ સંઘ સ્થાપેલ છે. તેથી... પૂ. સાધુ-સાધ્વી-શ્રાવક-શ્રાવિકા એવો સંઘ હોય... તેથી...
સાધુનો કોઈ ભક્ત ન હોય શ્રાવકનો કોઈ ગુરૂ ન હોય
મારા ભગવાનના બધા શ્રાવકો હોય... મારે ભગવાનના શ્રાવક બનાવવાના હોય... મારા ભગવાનના બધા સાધુ મારા ગુરૂ છે તેમનો ગચ્છ-કુલ-ગુણ જુદા હોઈ શકે પરંતુ સંઘ તો એક જ હોય. સમુદાય જુદા હોય. સંઘ જુદો ન હોય.
મેં પાપના ઉદયે એક ગુરૂ તો હોવા જ જોઈએ તેવી જુઠી પ્રરૂપણા કરીને મારૂં ટોળું વધારવા ઉપદેશ આપેલ હોય, લખાણ કરેલ હોય તેનું મિચ્છા મિ દુક્કડમ્. હું તેની માફી માંગું છું.
જેમને આવી રીતે વ્યક્તિ કે સમુદાય રાગી બનાવેલ હોય તેમની માફી માંગું છું. તે જીવો સદ્ધર્મ પામનારા બને, સંઘને માનનારા બને. બધા પૂ. સાધુ-સાધ્વીના ભક્તિ બહુમાનવાળા બને.
વ્યાખ્યાનની પાટ ઉપરથી માત્ર અનુગ્રહ બુદ્ધિથી વીતરાગ સર્વજ્ઞ ભગવંતની કહેલી વાત કહેવાને બદલે મેં મારી બુદ્ધિ-તર્ક લગાડીને શાસ્ત્રના અવળા અર્થ કરીને સમજાવેલ હોય... મારી વાતમાં હા જી હા ન કરનારા કે સામે પ્રશ્ન પુછનારને મેં ઉતારી પાડેલા હોય, હાંસી પાત્ર બનાવેલ હોય તેની હું માફી માંગું છું.
ઉપધાન-સંઘ-સંસ્કાર સત્ર-શિબિર-યુવા મિલન આવી કોઈપણ પ્રવૃત્તિ અંગે આદેશ પ્રધાન વ્યાખ્યાન દેવા તે સાધુનું કર્તવ્ય નથી તે વાત ભૂલીને પર્યુષણા જેવા દિવસોમાં જે તે વિષય સમજાવવાને બદલે મારે જે કરાવવું હોય તેના ઉપર ભાર આપીને વ્યાખ્યાન વાંચેલ હોય તેની હું માફી માંગું છું.
સીધી કે આડકતરી રીતે સાધુની માલીકીનું મંદિર ન હોય અને હોય તે પાપમંદિર છે આ મહાનિશીથમાંના તીર્થંકર નામ ગોત્રના દળીયા બંધાવનાર વચનને ભૂલીને મેં આવા મારી માલીકીના મંદિર બાંધેલ, બંધાવેલ કે બાંધેલાની અનુમોદના કરેલ હોય તો હું તેની માફી માંગું છું. તેને તીર્થ કે મહાતીર્થ કહેવાય જ નહીં.
