________________
વ્રત તથા સમાપની
મારા પ્રત્યે ઈર્ષા - દ્વેષ કરનારા જીવો ખૂબ સુખી થાઓ. મારી સાથે કપટ કરનારા જીવો સુખી થાઓ.
મારા નિમિત્તે કર્મ બાંધેલા પ્રાયશ્ચિત કરીને છુટી જાય પરંતુ તેમને કાંઈ તકલીફ ન થાય.
મારા કરેલા રાગ-દ્વેષ મને દુઃખી કરનાર છે.
મારા બાંધેલા અશુભ કર્મો મારું બગાડનાર છે. મને દુઃખ આપનાર મારો મોટામાં મોટો શત્રુ હું જ છું.
મારા દુઃખમાં નિમિત્ત બનનાર પ્રત્યે અત્યાર સુધીમાં કરેલા ક્રોધ, દ્વેષનું મિચ્છામિ દુક્કડમ્.
આ જગતમાં મારો પરમ મિત્ર હું જ છું. આ જગતમાં મારો પરમ શત્રુ હું જ છું. હું જ મને તારનારો છું. હું જ મને ડુબાડનાર છું. કર્માનુસાર બીજા જીવો મિત્રમાંથી શત્રુ બને છે. શત્રુમાંથી મિત્ર બને છે. વહાલા વૈરી બને છે. વૈરી વહાલા બને છે.
જગતના બધા જીવો સુખી થાઓ. કર્મથી મુક્ત થાઓ. જન્મ મરણથી મુક્ત બનો.
ભવોભવ બધા જોડે મારો મૈત્રીભાવ થાઓ. બધાનો બધા જોડે મૈત્રીભાવ થાઓ. કોઈને કોઈ જોડે વેરભાવ ન થાય. મારે કોઈ જોડે વેરભાવ ન થાય. પૂર્વે કોઈપણ ભવમાં થયેલ વેરભાવ નાશ પામે. હું બધાની માફી માંગું છું. હું બધાને માફી આપું છું.
હું દુઃખી થાઉં તેમ વિચારનાર ખૂબ સુખી થાઓ. મને પ્રતિકુળ થનાર જડ કે ચેતન પ્રત્યે મેં જે કાંઈ ક્રોધાદિ કષાય કરેલા હોય તેનું મિચ્છા મિ દુક્કડમ્.
