________________
બુદ્ધિવિજયજીના શિષ્ય એ પ્રમાણે ગુરુ-શિષ્યપણાની અને નામની સ્થાપના અનેક સાધુ-સાધ્વી તથા શેઠ હેમાભાઈ વગેરે ચતુર્વિધ સંઘની સમક્ષ સંવત ૧૯૧૨માં કરવામાં આવી. રહેવાનું સ્થાન ન ફેરવતાં ઉજમબાઈની ધર્મશાળાએ જ રાખવામાં આવ્યું. ત્યારપછી તે ચોમાસું ત્રણે મુનિરાજે ત્યાં જ કર્યું અને સંવત ૧૯૧૩નું ચોમાસું પણ મુનિરાજ શ્રીબુદ્ધિવિજયજી તથા મુનિ વૃદ્ધિવિજયજીએ તો અમદાવાદમાં જ કર્યું. પણ મુનિ મુક્તિવિજયજી તો સંવત ૧૯૧૩માં અમદાવાદથી વિહાર કરી પાલીતાણે યાત્રા કરી ભાવનગરમાં આવ્યા અને તે ચોમાસું ત્યાં (ભાવનગરમાં) કર્યું. અમદાવાદમાં મુનિ વૃદ્ધિચંદ્રજીએ બીજા અભ્યાસની સાથે પંડિત હરનારાયણની પાસે ચંદ્રિકાની બીજી વૃત્તિનો અભ્યાસ કર્યો.
સં. ૧૯૧૩માં બે ગુરુભાઈની વૃદ્ધિ થઈ. ભાવનગરમાં સુરતના શ્રાવક નગીનદાસને મુનિ મૂલચંદજીએ ત્યાગવૈરાગ્યાદિની પરીક્ષા કરીને ગુરુમહારાજના નામથી દીક્ષા આપી. તેનું મુનિ નિત્યવિજયજી નામ રાખ્યું. મહારાજશ્રીના પ્રતાપી શિષ્ય તરીકે એમણે પણ સારી પ્રતિષ્ઠા વધારી. આગળ જતાં એમની ઉપદેશશક્તિ એવી ફરાયમાન થઈ કે વૈરાગ્યનું બીજમાત્ર જેમાં રોપાયેલ હોય એવો કોઈ પ્રાણી તેમની પાસે આવે તો તે ઉપદેશધારા વડે તેને સિંચન કરીને સ્વલ્પકાળમાં વૈરાગ્યવૃક્ષનો ઉદ્ગમ કરે. જેથી ઘણું કરીને તો
૨૮
