________________
८
જૈન તત્ત્વજ્ઞાન સરળ ભાષામાં
ભિન્ન છે. વગેરે... આ તમામે તમામ વાતો ઉપર આપણે આંખ મીંચીને ‘Yes’ કહેવું જોઈએ. તે વખતે બોલવું જોઈએ કે, “મારા મહાવીર કદી જૂઠ્ઠું બોલે નહિ. જો એમણે કહ્યું છે કે, ‘બટાટામાં અનંતા જીવ છે' તો તે વાત મને એક હજાર ટકા મંજૂર છે. હું લૅબોરેટરીમાં જઈને તે બટાટામાં અનંતા જીવ છે કે નહિ ? તેની તપાસ પણ કરવા જનાર નથી. એમાં ય મારા ભગવાન ઉપરની મારી અશ્રદ્ધા સાબિત થાય.
જો આંખ મીંચીને વિશ્વાસુ ડૉક્ટરની કોઈ પણ દવા મોમાં મૂકી શકાય છે તો આંખ મીંચીને ભગવાન મહાવીરની વાતો મનમાં ઉતારી દેવી જોઈએ. વારંવાર એ વાત બોલાયા કરે, “મારા મહાવીર કદી જૂઠ્ઠું બોલે જ નહિ. એમણે કહેલી વાતોનો મારા જીવનમાં અમલ કરવામાં હું કદાચ ઊણો ઊતરતો હોઈશ પરન્તુ એમણે કહ્યું છે તે જ સાચું છે. આટલું તો હું જડબેસલાક માનું છું.”
જેમ આર્યભિષક નામના આયુર્વેદના પ્રમાણભૂત ગણાતા ગ્રન્થમાંની હરડે, આંબળા, લીંબુ વગેરે ૫-૭ ઔષધિઓનો જાત ઉપર પ્રયોગ થાય અને ગ્રન્થમાં જણાવેલી તે અંગેની વાતો બરાબર નીકળે તો તે ગ્રન્થની બાકીની ત્રણ હજાર દવાઓ ઉપર આંખ મીંચીને વિશ્વાસ મૂકી દેવો જોઈએ, દરેકે દરેક દવાનો કાંઈ પ્રયોગ ન કરાય.
ઘરની સ્ત્રી, ‘ભાત બરોબર ચડ્યા છે કે નહિ ?” તેનો નિર્ણય કરવા માટે ઓરવા મૂકેલા ભાતના ચાર-છ દાણા જ દબાવીને જોઈ લે છે કે તે કેવા સીઝયા છે ? આ ઉપરથી તમામ દાણા સીઝી ગયાનો નિર્ણય થઈ જાય છે. દરેક દાણો દબાવીને જોવાતો નથી.
