Page Text
________________
તેથી કષાયને આધીન થઈ ગયેલા જૈનાચાર્ય મહર્ષિ હરિભદ્રસૂરિજી કેટલા ભયાનક વિકલ્પોનો ભોગ બની ગયા હતા!
અહંકારને આધીન થયેલા બાહુબલિજી મુનિનું એક વર્ષનું અતિ કઠોર મુનિજીવન પણ કેવલ્ય આપવામાં કેવું નિષ્ફળ બની રહ્યું હતું !
યુદ્ધ-સંબંધિત કષાય ખૂબ તીવ્ર બનતો હોય છે. અચ્છા અચ્છા આત્માઓને પણ એક વાર આ કષાય કર્મબંધનના ચક્કરમાં નાંખી દેવા સમર્થ બની જાય છે.
નજરમાં લાવો; એ જ ભવે મોક્ષ પામનારા પરમાત્મા આદિનાથના બે પુત્રો ભરત અને બાહુબલિનો યુદ્ધકીય અતિઘોર સંહાર !
નજરમાં લાવો; એક લાખ માણસોને મોતને ઘાટ ઉતારી દેતો કલિંગના યુદ્ધનો મહાસંહાર !
નજરમાં લાવો; મહારાજા ચેડા અને મગધપતિ કોણિક-બંને જૈન-ના બે યુદ્ધોમાં ઢળી પડેલી એક કરોડ એંસી લાખ માણસોની લાશો !
નજરમાં લાવો; એકવીસ વખત પૃથ્વીને ક્ષત્રિયવિહોણી બનાવતી પરશુરામની અઘોર કલ્લેઆમ !
નજરમાં લાવો; હીરોશીમા અને નાગાસાકી ઉપર ઝીંકાયેલા અમેરિકન એટમબૉમ્બ દ્વારા સર્જાયેલું વિનાશનું મહાતાંડવ !
નજરમાં લાવો; વર્તમાનકાળમાં રશિયા, અમેરિકા, વિયેતનામ, કંપુચિયા, આફ્રિકન દેશો, કોરિયા, ઈસ્લામી દેશો વગેરેમાં પેદા કરાતી યાદવાસ્થળી અને અપાતી શસ્ત્રસહાયો દ્વારા ચલાવાતી અઘોર કલેઆમ!
નજર કરો; વિશ્વના ભાવિ ઉપર ! પાંચસો વખત આખા વિશ્વનો સર્વનાશ કરી શકે એટલો શસ્ત્રસરંજામ રશિયા, અમેરિકા પાસે આજની તારીખમાં તૈયાર પડ્યો છે.
કેવું હશે વિશ્વનું ભાવિ ? ભગવાન જાણે ! હવે માનવનું નહિ, માનવજાતિનું જ સ્મશાન બનશે આખું વિશ્વ પોતે જ.
શ્રીકૃષ્ણ : મહાન રાજકારણી યુદ્ધની નીતિઓના અગ્રદૂત અને મુખ્ય પ્રણેતા શ્રીકૃષ્ણને જે કાંઈ ફરજ બજાવવી પડી છે તે જોતાં એમ લાગે છે કે તેમને કમસેકમ મહાભારતીય યુદ્ધ પૂરતા તો ભગવાન તરીકે જોવા કરતાં જબરદસ્ત રાજકારણી તરીકે જોવા ઉચિત લાગે છે. ભગવાન “જેવા સાથે તેવા' થવાની યુદ્ધનીતિના પ્રણેતા બને તે વાત બિલકુલ અસંભવિત લાગે છે.
પણ આ રાજનીતિ કેટલી બધી છલકપટોથી ભરપૂર છે ! તેના ક્ષેત્રમાં તે ગમે તેટલી યોગ્ય ગણાતી હોય પણ અંતે તો એ ત્યાજય જ કહેવાય.
ધર્મ તો મારો સ્વભાવ છે
૧૬૮
જૈન મહાભારત ભાગ-૨
| SR No. | 009165 |
| Book Title | Jain Mahabharat Part 02 |
| Original Sutra Author | N/A |
| Author | Chandrashekharvijay |
| Publisher | Kamal Prakashan |
| Publication Year | 2004 |
| Total Pages | 222 |
| Language | Gujarati |
| Classification | Book_Gujarati |
| File Size | 1 MB |