________________
આજે તો મારે જ આ નિયમ લેવાની જરૂર છે. આપણા પગ ઉપર કુહાડો મારીએ તો બીજાને કહેવાની જરૂર નહિ રહે. આપણા આચારથી જ સામેનો સુધરી જાય. ગમે તે રીતે પણ કંઈક નિર્ણય કરીને અહીંથી ઊઠવું છે. ગૌતમસ્વામી મહારાજની કેવળજ્ઞાનપ્રાપ્તિના આ દિવસે શ્રુતજ્ઞાનની પ્રાપ્તિ માટે કાંઈક પ્રયત્ન કરી લેવો છે. જે પુરુષાર્થ મંદ પડતો ગયો છે તેને વેગ આપવા માટે તૈયાર થયું છે.
સ. દોષો નાબૂદ ભલે ન થાય પણ વધવા તો ન જ જોઈએ. એમ જે કહ્યું, તે માટે કયો પુરુષાર્થ કરવો જોઈએ?
પંદર કલાકનો સ્વાધ્યાય કરે તેનો એક પણ દોષ ન વધે. આજુબાજુ ગમે તે થતું હોય આપણું માથું ચોપડીમાંથી બહાર ન જવું જોઈએ. ઓફિસમાં કામ કરનારા, બહાર ગમે તેવો ઝઘડો ચાલ્યો હોય તોય કામ મૂકીને બહાર ન જાય, અમારા ધર્માત્માઓ તો ચરવળો લઈને ફરવા નીકળી પડે. સાધુધર્મની પરિભાવના આ રીતે કરીને આવે તેવાઓ અહીં આવીને સ્થિરતા ક્યાંથી પામે? સોનાચાંદીની દુકાનમાં બે દિવસ સુધી ઘરાક ના આવે તોપણ દુકાન બંધ કરીને જતા નથી કે બહાર ફરવા નીકળી પડતા નથી. કારણ કે આશા અમર છે, માટે જ ખસતા નથી. આપણી આશા મરી પરવારી લાગે છે. મોક્ષ જોઈતો નથી, કેવળજ્ઞાન જોઈતું નથી માટે જ પુરુષાર્થ કરતા નથી અને શાંતિથી બેસી રહ્યા છીએ !
આજના દિવસે ગૌતમસ્વામી મહારાજાને યાદ કરવા છે તે અનંતલબ્ધિના નિધાન તરીકે નથી કરવા. પહેલાં
( ૪૩)
