________________
આનો અર્થ? આ જ કે ડર શરૂઆતમાં મનમાં મુલાકાતી તરીકે આવે છે. આપણે એને સ્થાન આપીએ છીએ એટલે એ મહેમાન બનીને ગોઠવાઈ જાય છે અને પછી એક દિવસ એવો આવે છે કે માલિક બનીને એ મનનો કબજો જમાવી બેસે છે.
તેં તારી જે મૂંઝવણ જણાવી છે ને, એનાં મૂળમાં આ જ છે. તારું મન તારું નથી રહ્યું, ડરનું બની ગયું છે. એ તને જેમ નચાવે છે એમ તું નાચતો રહે છે. છતાં આમાંથી તું ધારે એ ઘડીએ બહાર નીકળી શકે તેમ છે. જરૂર છે તારે કાલ્પનિક ભયથી મુક્ત બની જવાની. “થશે?” એ વિચારને નંબર બે પર રાખી દઈને શું થઈ રહ્યું છે?” એ વિચારને નંબર એક પર રાખી દે.
યાદ રાખજે, કાલ્પનિક ભયની ઉપસ્થિતિમાં દોરડું સાપ બનીને ડરાવતું હોય છે. તું અત્યારે કાં તો જાગ્રત બની જા અને કાં તો મદારી બની જા. મન તારું ભયમુક્ત બનીને જ રહેશે.
