________________
સાચું કહું?
અંતઃકરણ બદલાતાં જ જેમ આચરણ બદલાવા લાગે છે તેમ કર્તવ્યનું પાલન થતાં જ અધિકારની પ્રાપ્તિ થવા લાગે છે. પણ આ સદી તો બુદ્ધિજીવીઓની સદી છે ને? ત્યાં હવામાં એક જ વાત છે, અધિકારોની!
પિતાજી ઇચ્છે છે મને ‘બાપ' તરીકેના અધિકારો મળવા જ જોઈએ અને દીકરો કહે છે, મને “પુત્ર' તરીકેના અધિકારો મળવા જ જોઈએ. જ્યાં બધા ભિખારીઓ જ ભેગા થયા હોય ત્યાં જો શાંતિ સંભવિત નથી તો જ્યાં બધા અધિકાર માગવાવાળા જ ભેગા થયા હોય ત્યાં પ્રસન્નતા ય સંભવિત નથી.
તું મનને અજંપામુક્ત બનાવવા માગે છે ને? જે પણ ક્ષેત્રમાં તું હોય, એ ક્ષેત્રને અનુરૂપ કર્તવ્યોનું પાલન તું કરતો જા. અજંપાનું સ્થાન પ્રસન્નતા લઈને જ રહેશે.
