________________
પ્રથમ સાયલા જવાના હતા. પરંતુ બગડ ગામનો ચોરીનો પ્રશ્ન આવ્યો, એટલે વિહાર બગડનો નક્કી થયો. - રાત્રીસભામાં મહારાજશ્રીએ ખસ ગામે ચાતુર્માસ દરમિયાન બનેલા બનાવોની સમીક્ષા કરી હતી. ગામે જે ભક્તિભાવ બતાવ્યો, આવનાર મહેમાનોની સેવા, શુશ્રુષા બજાવી તેની કદર કરી અને પોતાને સહેજ પણ દુ:ખ લાગે તેવા પ્રસંગો વિચારપૂર્વક નહિ બનવા દેવાની ગામે જે કાળજી રાખી, એનો ઉલ્લેખ કર્યો. ગ્રામપંચાયત વધુ શક્તિશાળી બને અને આજ કરતાં વધુ સુંદર કામ કરે. અસ્પૃશ્યો સાથે બંધુભાવે વર્તે, અને કુસંપ દૂર કરવા જણાવ્યું.
બરાબર નવ વાગે સરઘસ આકારે વાજતે ગાજતે સૌ સ્ટેશન ઉપર આવ્યા. ત્યાં સભા થઈ. એટલે તેમાં કુરેશભાઈએ સંઘ વતી ગામનો આભાર માન્યો. છોટુભાઈએ પણ થોડું ઉદ્બોધન કર્યું. પછી મહારાજશ્રીએ સૌનો આભાર માન્યો. ગામ તરફથી મનુભાઈએ ભૂલચૂક થઈ હોય તો માફી માંગી.
બગડની ચોરીનો પ્રશ્ન એક નિમિત્તરૂપ બન્યો. પણ એ એક પ્રયોગ થઈ પડ્યો. એનો ઉલ્લેખ કર્યો. અને ગામે એમાં સહકાર આપ્યો છે તેથી સંતોષ વ્યક્ત કર્યો. તા. ૨-૧૧-૧૯૫ર : બગડ
ખસથી નીકળી બગડ આવ્યા. અંતર દોઢ માઈલ હશે. ઉતારો ઉપાશ્રયમાં રાખ્યો હતો. ખસના લગભગ તમામ ભાઈ-બહેનો જો કે આખું ગામ અમને વિદાય આપવા આવ્યું હોય એમ અમારી સાથે બગડ આવ્યા હતા. આખે રસ્તે મોટો માનવમહેરામણ ઊમટ્યો હતો. સુંદર દશ્ય લાગતું હતું. બગડવાસીઓએ વાજતે ગાજતે સ્વાગત કર્યું. ચોકમાં જાહેરસભા થઈ. એમાં મહારાજશ્રીએ વિશ્વવાત્સલ્ય શુદ્ધિ પ્રયોગનો આખો માર્ગ સમજાવ્યો. ગમે તેવા પાપીમાં પણ ઈશ્વર વસે છે. પાપી પોતાનાં પાપ પોકારે તો તેનો ઉદ્ધાર થઈ જાય છે. તેમ અહીંના ગુનેગારોના અંતરમાં બેઠેલો રામ જાગે. રાવણ દૂર હટે એ માટે સૌને યત્ન કરવા જણાવ્યું.
મારથી કે ડરથી કોઈનું પરિવર્તન થતું નથી. અહીં એક બાઈને ત્યાં સાધુતાની પગદંડી
