________________
શ્રી સંતબાલજીનો જાહેર સમારંભ
વિરમગામમાં તા. ૨૦-૧૧-૪૫ મંગળવાર રાત્રે સાત વાગે શ્રી વિરમગામ તાલુકા સમિતિ તરફથી પૂ. શ્રી સંતબાલજી પાંચ માસ અત્રે રોકાઈ ૨૧-૧૧-૪પને રોજ વિદાય થવાના હોઈ તેમને નમ્ર અંજલિ આપવા સારુ કાર્યક્રમ યોજવામાં આવ્યો હતો. સમારંભનું પ્રમુખસ્થાન ગુજરાત વિદ્યાપીઠના મહામાત્ર શ્રી મગનભાઈ દેસાઈએ સ્વીકાર્યું હતું.
સભાની શરૂઆત સાત વાગે પ્રાર્થનાથી કરવામાં આવી હતી. ત્યારબાદ પ્રમુખસ્થાન સ્વીકારવાની વિનંતી માટે તાલુકા સમિતિના પ્રમુખ શ્રી પુરુષોત્તમદાસે દરખાસ્ત મૂકી હતી. આ વેળાએ સભાજનોની હાજરી આશરે અઢી હજારની હતી.
છેલ્લા પાંચ માસથી આપણા શહેરમાં પૂ. શ્રી સંતબાલજી ચાતુર્માસ ગાળી રહ્યા છે. તેઓએ અહીં રહીને વિરમગામ તાલુકા તથા ગામતળની પ્રજાને ધર્મદષ્ટિ અને દોરવણી આપી છે. હવે તેઓશ્રી અહીંથી આવતી કાલે વિદાય થાય છે. તેથી તેઓને નમ્ર અંજલિ અર્પવા આ સમારંભ યોજવામાં આવ્યો છે અને તેના પ્રમુખસ્થાને બિરાજવા હું શ્રી મગનભાઈને વિનંતી કરું છું.
મગનભાઈનો પરિચય ત્યારબાદ પરિચય આપતાં તેમણે જણાવ્યું કે સને ૧૯૨૧માં શાળા કૉલેજ છોડવાની હાકલ પૂ. ગાંધીજીએ કરી હતી, ત્યારે મગનભાઈ કૉલેજ છોડીને ચાલ્યા આવેલા, ત્યારથી આજ દિન લગી વિદ્યાપીઠમાં જ રહ્યા છે અને હાલ તેઓ મહામાત્ર તરીકે છે. તેઓ વિદ્યાભ્યાસ કરતા હતા ત્યારે પણ તેમનો અભ્યાસ ઊંચો હતો.
ઠરાવને ટેકો ત્યારબાદ ભાઈશ્રી મગનલાલ શુકલે ઠરાવને ટેકો આપતાં જણાવ્યું હતું કે શ્રી સંતબાલજીએ આપણને પાંચ માસ દરમિયાન જે સમજાવ્યું છે તેનો પ્રત્યક્ષ અમલ કરીને જ ખરી રીતે તો તેમને જવાબ આપી શકાય. આપણે બધા તેમનો આદેશ પાળીશું, એ વચન આપવા માટે આ સમારંભ યોજાયો છે. તેના પ્રમુખસ્થાન માટે ભાઈશ્રી મગનભાઈનું નામ સૂચવાયું છે, તેને મારો હાર્દિક ટેકો છે. ત્યારબાદ પ્રમુખશ્રીને સૂતરનો હાર પહેરાવવામાં આવ્યો હતો અને સભાનું કામ શરૂ થયું હતું.
સાધુતાની પગદંડી
