________________
ક્ષણિકનો બોધ અને નિત્યનો અનુભવ
જે પરિગ્રહને જીવે પોતે ગ્રહણ કર્યો છે, તે પરિગ્રહ સંબંધી હિંસા, જૂઠ, ચોરી તથા કુશીલ વગેરે પાપનો બંધ પણ જીવ નિયમથી થઇ રહ્યો છે, એમ સમજવું. કોઈ વસ્તુની ચોરી કરતી વેળા જ ચોરી સંબંધી પાપનો બંધ થતો નથી, પણ તેને જ્યાં સુધી પોતાની પાસે રાખીએ છીએ, ત્યાં સુધી પાપનો બંધ થાય છે. ઇન્કમટેક્સની ચોરી કરવાના કાળે જ ચોરી નામનો પાપનો બંધ થતો નથી, પણ ઇન્કમટેક્સની ચોરી કરીને એકઠા કરેલા ધનથી ટેલિવિજન ખરીદે છે, જ્યાં સુધી તે ટેલિવિજનનો પરિગ્રહ રાખે છે, ત્યાં સુધી તેને ચોરી સંબંધી પાપનો બંધ થાય છે.
એ જ પ્રમાણે તમે પોતે મુંબઈમાં રહો છો, પણ એક ઘર અમેરિકામાં પણ રાખેલ છે. તમે અમેરિકામાં રહેતા નથી, પણ તે ધર તમારો પરિગ્રહ હોવાથી તે ઘરમાંથી થતી ઊધઈ વગેરે જીવોની હિંસાનો પાપબંધ પણ તમને મુંબઈમાં બેઠાબેઠા થઇ રહ્યો છે. મુંબઈમાં બેઠા-બેઠા અમેરિકા થકી પાપ કર્મની કમાણી થઈ રહી છે.
અરે ભાઈ! તેથી જ તીર્થકરોને પુણ્યના ઉદયથી અઢળક વૈભવ પ્રાપ્ત થયો હોવા છતાં તેઓ તેને ન ભોગવીને મોક્ષમાર્ગ પર ચાલી ગયા, તે જ કારણ છે કે તેઓ આજે સિદ્ધપદ પર વિરાજમાન છે, અનંતસુખને પ્રતિસમય ભોગવી રહ્યા છે.
