________________
૧૭ ગરબી ૭ મી
ઉદ્યમ શું ન કરી શકે? (જોબનિયાનો ચટકો રે દા'ડા ચારનો એ રાગ) શાણી, સુણ તું ઉદ્યમ કેરી વાતડી, કરું પ્રશંસા જેની હું બહુ આજ જો; કોવિદ ને કવિજન વખાણે જેહને, જેથી થાયે મોટાં મોટાં કાજ જો. શાણી૧ સહેલાં સર્વે કામો એથી થાય છે, એથી સર્વે જાણો મોટાં સુખ જો; બેઠાં રહેવાથી નથી કાંઈ ફાયદો, શું એના કહું ગુણો હું તો મુખ જો. શાણી- ૨ ઉદ્યમનો કરનારો ભૂખે નહિ મરે, ઉદ્યમથી તો સુઘરે ડાહી કાજ જો; ઉદ્યમ કરતાં શું નહિ પામે માનવી? દે પ્રત્યુત્તર તેનો તું તો આજ જો. શાણી. ૩ સ્નેહે ઉદ્યમ • આદરે જે કો માનવી, આણીને ઉર માંહી હિત વિચાર જો; તો તે જાણો પગલે સુખને આવિયો, ઉદ્યમે આગળ ચડતો જાય અપાર જો. શાણી ૪ મંડ્યા રહીને આદરશે ઉદ્યમ જે, કરશે ઈશ્વર તેને ઘટતી સહાય જો; રાયચંદ વણિકની એવી વિનતિ, સર્વે સિદ્ધિ-કામો એથી થાય જો. શાણી ૫
૧. હોશિયાર, ડાહ્યા, અનુભવી
