________________
॥ अर्हम् ॥
सिरिभद्देसरसूरिविरइआ
कहावली
[पढमपरिच्छेअस्स बिइओ खंडो] [पढमे खंडे अद्धं चेव कहियं बंधुयत्तचरियं एत्थ अणुवट्टइ-] तत्तो निरूविऊणं, सामग्गि भंड-वाहणाईणं । पट्ठवइ बंधुदत्तं, सुदिणे पियदंसणासहियं ॥ 'नायउरिं जाह'ति य, सो घोसावित्तु मिलियसत्थजणं । संवाहिऊण जंतो, पत्तो उ मा(महा)डवि भीमं ॥ तं च तिदिणेहिं लंघिउ-मावासिया पल्ललंतिए जाव । ता पडइ चंडसेणा-वइणो रयणीचरमजामे ॥ सत्थंमि भिल्लसेणा, सम्मुहमुट्ठित्तु सत्थपुरिसा य । जुझंति समं तीए, जित्ता य दिसोदिसि नट्ठा ॥ निजिणिऊण य सत्थं, रित्थं घेत्तूण बहुविहमसेसं । पियदंसणं च भिल्ला, उवट्ठिया चंडसेणस्स ॥ भणिओ य तेहि - 'एयं रित्थं सत्थो त्ति देव ! गहिओ त्ति । जुवई य का वि एसा, संपइ देवो पमाणं ति' ॥ सो दट्ठ मिलाणमुहं, दयाए चिंतेइ - 'किंचि दाउ धणं । नियपुरिसेहिं परागो(णे?)वेमीमं बंधुवग्गस्स' ॥ तो भणइ चंडसेणो, - 'सुंदरि ! तुब्भेऽत्थ आगया कत्तो ?' । पियदंसणा वि दुहिया, न किंचि तस्सुत्तरं देइ ।
