________________
ભૂમિકા
વિજયશીલચન્દ્રસૂરિ શ્રીવીર પરમાત્માના મંગલમય શાસનને, પોતાનાં જ્ઞાન, સ્વાધ્યાય, ગ્રંથ સર્જન એ બધાં દ્વારા, અજવાળનારા અગણિત મહાપુરુષો આપણા ઈતિહાસના પાને નોંધાયેલા મળે છે. એ સર્વ મહાત્માઓની પહેલી ભૂમિકા આત્મસાધનાની રહી છે. પોતાના આત્માનું સાધન કરવું, કલ્યાણ કરવું એ જ એમનો મુખ્ય આશય છે. આત્માનું કલ્યાણ કરવાના એક ભાગરૂપે એમણે ગ્રંથો રચ્યા. એ દ્વારા એમણે લોકોને બોધ આપ્યો. એમના માટે, બીજાને બોધ આપવો એ પણ, આત્મકલ્યાણનું માધ્યમ. બીજાઓનું જ્ઞાન વધે તેવા ગ્રંથોની રચના કરવી એ પણ આત્મકલ્યાણનું સાધન.
એટલે જ જ્યાં જ્યાં ગ્રંથની પૂર્ણાહુતિ થાય ત્યાં એ લોકો એક જ માગણી કરે કે આ ગ્રંથની રચના દ્વારા મેં કોઈપણ પુણ્ય જો ઉપાર્જન કર્યું હોય, તો એ પુણ્યના પ્રભાવ વડે જગતના તમામ લોકોને મોક્ષ મળજો ! બસ, આ જ એમની પ્રાર્થના !
