________________
પાઠ ૨જો
આત્માની શક્તિઓને ઢાંકનાર કર્મો
ગયા પાઠમાં આપણે આત્માના સ્વરૂપ વિશે કેટલુંક વિસ્તારથી વિવેચન કરી ગયા, તેથી હવે તમારા સમજવામાં બરાબર આવ્યું હશે કે– “આત્મા” એ કેવો વિચિત્ર પદાર્થ છે ?
ખરેખર આત્માના સંબંધમાં અમે ગયા પાઠમાં ઘણું શીખ્યા.
આપણે ગઈ કાલે આત્માનું સ્વરૂપ વિચાર્યું, તેવો જ તમારો આત્મા છે ? તેવું તો કંઈ જણાતું નથી. તેનું કારણ ?
તેનું કારણ શું હશે જી ?
ચાલો વિચાર કરીએ.
તમારા આત્મામાં જાણવાની શક્તિ તો છે ને ?
હા, જી.
કેટલી શક્તિ છે તે કહી શકશો ?
તેનું માપ શી રીતે કાઢી શકાય !
તમારા વિદ્યાભ્યાસના પ્રમાણમાં—તમે નાના હતા તેના કરતાં— હાલ કંઈક અનુભવ વધ્યો છે કે નહીં ?
હા, વધ્યો છે. પરંતુ હજુ આપના જેટલો નહીં.
એ ખરું, પણ વખત જતાં અમારા કરતાં પણ તમારો અનુભવ વધી જાય તેવો સંભવ ખરો કે નહીં.
હા, એવી કલ્પના કરી શકાય ખરી.
