________________
વાર્તા શૈલીનો પરિચય :
“કલિંગ ચક્રવર્તી મહારાજાધિરાજ ખારવેલ” આ એક અપરિચિત-પ્રાયઃ નામ હોવા છતાં આનો પરિચય જાણવા-માણવા જેવો છે. આ એક ઐતિહાસિક વિરલ-વિભૂતિ છે. આ સળંગ-વાર્તાનું પ્રથમ-પ્રકરણ જ આ પરિચય સુપેરે કરાવી જાય છે. આ વાર્તા ઐતિહાસિક-ગ્રંથોના ખૂબ જ મનનમંથન-સંશોધન બાદ લખાઈ છે. બીજા શબ્દોમાં કહીએ, તો ઐતિહાસિક-ગ્રંથોમાં વેર-વિખેર પડેલા મણકાંઓને માળા રૂપે ગુંથવાનો આમાં કષ્ટ સાધ્ય છતાં અત્યંતોપકારી પ્રયાસ થયો છે.
વિવિધ સમય-સ્થળને સ્પર્શતી આ વાર્તાની પાત્ર-સૃષ્ટિનું દર્શન કરનારો સ્વયં જ સમજી શકે એમ છે કે, આવું આલેખન કેટલું બધું કઠિન ગણાય. કોઈ એક જ ગ્રંથના આધારેય વાર્તા લખવી જ્યાં સહેલી નથી, ત્યાં અનેક ગ્રંથોને નજર સામે રાખીને ખોજની દૃષ્ટિ અપનાવવા પૂર્વક વાર્તા લખવી અને એમાં પુનઃ કથારસ તેમજ ઐતિહાસિકતા : આ બંનેને ટકાવી રાખવા કેટલા અઘરા હોય, એ તો કોઈ સર્જક જ સમજી શકે ! વાચક જે પ્રકરણ ૧૫ મિનિટમાં વાંચી જાય, એની પાછળ સર્જકને ઘણીવાર પાંચ કલાકની ખોજ પણ કરવી પડી હોય, એ સંભવિત છે.
