________________
કવિ દલપતરામ આની સામે સણસણતો જવાબ વાળતા: જે ના ટકે એવા નાટક પાછળ લાખેણી લેખિનીને ટકાના શેરના ભાવે વેચનારા નવરા નાટ્યકારોએ તો આ દુનિયાનું નખ્ખોદ વાળ્યું છે. આના સર્જન પાછળ એ જાતનો સમય તો વેડફે જ છે! પણ એ સર્જનને રંગભૂમિ પર લાવીને દુનિયાના સમયનો પણ એઓ દુરુપયોગ કરાવે છે. લખવું જ હોય, તો એવું લખવું જોઈએ કે, જેનો સ્ત્રોત અંતરમાંથી વહેતો હોય! બાકી પારકાં પાત્રો પર કલમને ઘસી બોળવાથી શું વળ્યું !
આમ, વાતવાતમાં કવિ અને નાટ્યકાર વચ્ચે કલમની કટારીનો આવો સંગ્રામ ખેલાયા જ કરતો. માછલીને તરવાનું શિખવાડવું પડે, એનો શો અર્થ ? પંડિતને પ્રેમના પાઠ પઢાવવા પડે, તો એની પંડિતાઈની પછી વડાઈ શી? કવિ અને નાટ્યકાર કલમની કટાર ઉગામીને અખબારોના આંગણે લડ્યા જ કરતા. એમના જેવાને પ્રેમનો મહિમા કોણ સમજાવે? કોણ એમને ખ્યાલ કરાવે કે, બેનો આંકડો નજીક નજીક બેસે, તો એમાં બાવીસનું બળ જ ઊભરાય છે પરંતુ એ જ આંકડો જો સામસામો ટકરાઈ જાય, તો એમાં ચાર જેટલું જ બળ ટકે છે. માટે મૈત્રીનો મહિમા સમજો અને તમે બે સમાજને બાવીસનું બળ પૂરું પાડો.
ઢાઈ અક્ષર પ્રેમકા પઢે સો પંડિત હોઈની વાણી દલપતરામ અને ડાહ્યાભાઈને ઘણી સાંભરતી અને માન મૂકીને એકબીજાની મોટાઈ કબૂલવા એઓ ઘણી વાર મનોમન તૈયાર પણ થઈ જતા. પરંતુ દિલના દરમાં સૂતેલી સ્વમાનની સાપણ ત્યારે લપલપ કરતી બહાર ધસી આવતી અને બંનેનાં હૈયાંમાં વેરનું ઝેર ફેલાઈ જતું.
? જ છ જૈનશાસનના જ્યોતિર્ધરો ભાગ-૩
