________________
અફસોસ ! હવે ન તો આપના દર્શન થશે કે ન તો આપના પત્રો આવશે. હવે તો આપની પ્રતિકૃતિ, આપના હસ્તાક્ષરો અને આપે સંશોધિત-સંપાદિત કરેલા પ્રકાશનો દ્વારા જ આપને મળવાનું રહેશે. તે છતાં આપને આજે આ દીર્ઘ પત્ર લખવાની ધૃષ્ટતા કરી છે. આ પત્ર લખતાં અમારા પર શું વીતી છે... એ તો અમારું મન જાણે છે, થોડું આપ પણ જાણો. નામ તમારું લખ્યું હજુ ત્યાં આંસુ આવ્યા આગળ, ઝળહળિયાની ઝાંખપ વચ્ચે લખીએ ક્યાંથી કાગળ. સુખની ઘટના લખું તમોને ત્યાં દુ:ખ કલમને રોકે, દુઃખની ઘટના લખવા જાઉં ત્યાં હૈયું હાથને રોકે. છેકા છેકી કરતાં કરતાં પૂરો થઈ ગયો કાગળ, નામ તમારું લખ્યું હજુ ત્યાં આંસુ આવ્યા આગળ...
અમને ખબર છે... આ પત્ર આપને નથી પહોંચવાનો, છતાંય અમે અમારા મનની શાંતિ માટે આ પત્ર લખ્યો છે. આપના દિવ્યજ્ઞાનથી આ પત્ર જો આપ વાંચો... તો અમને ઈશારો કરજો. પત્ર લખતા અમારી કોઈ ક્ષતિ થઈ ગઈ હોય તો અમને માફ કરજો. ફરી એકવાર આપના ચરણોમાં કોટિશઃ વંદના.
s
