________________
0 નબળા અભ્યાસનું
સબળ કારણ આજથી લગભગ પચ્ચીસ વર્ષ પહેલાં એસ.એસ.સી પાસ કરીને વાણિજ્યના સ્નાતક બનેલા એક મિત્ર, પોતાના પ્રતિભાશાળી વ્યક્તિત્વથી પોતાનાં એક વિશિષ્ટ કાર્યક્ષેત્રમાં ખૂબ પ્રભાવ પાડી રહ્યા છે. અંગ્રેજી ભાષા પર તેમનું ખૂબ પ્રભુત્વ છે. તેમના વખતમાં અગિયારમા ધોરણમાં મેટ્રિકની પરીક્ષા આપવાની રહેતી. વિરમગામ તાલુકાના પોતાના નાનકડા ગામડામાં સાતમા ધોરણ સુધી પ્રાથમિક શાળામાં અભ્યાસ કરીને આઠમા ધોરણથી પોતાના ગામમાં જ નવી ખૂલેલી માધ્યમિક શાળામાં તેઓ જોડાયા. આઠમા ધોરણથી અંગ્રેજી ભાષા પણ શરૂ થઇ. દસમા ધોરણ સુધી તે શાળામાં અભ્યાસ કરીને અગિયારમા ધોરણમાં મુંબઇની શેઠ જી.ટી. હાઇસ્કૂલમાં દાખલ થયા. તેમના કુટુંબના વડીલોને મનમાં એકધાસ્તી હતી કે આઠમા ધોરણથી અંગ્રેજીવાળી ગામડાની નિશાળમાંથી, પાંચમા ધોરણથી અંગ્રેજી શીખવતી મુંબઇની હાઇસ્કૂલમાં એસ.એસ.સી ના મહત્ત્વના તબક્કે દીકરાને દાખલ તો કરીએ છીએ પણ તેની કેરિયર પર અસર તો નહીં થાય ને ! પણ તે ભય તદ્દન જૂઠો પુરવાર થયો. પ્રિલિમ પરીક્ષામાં એ શાળાના ઇતિહાસમાં અંગ્રેજીના વિષયમાં અભૂતપૂર્વ ગુણાંક સાથે અઢીસો વિદ્યાર્થીઓમાં પ્રથમ નંબરે ઉત્તીર્ણ થયા.
તેમનું અંગ્રેજીનું ઉત્તરપત્ર જોઇને દંગ બની ગયેલા આચાર્યશ્રી શાળાના વર્ગમાં આવ્યા અને ધન્યવાદપૂર્વક આશ્ચર્ય વ્યક્ત કરતાં પૂછયું, “તમે તો ગુજરાતમાંથી આ વર્ષે જ આવ્યા છો. ગુજરાતના વિદ્યાર્થીનું ગણિત પાકું ને અંગ્રેજી સાવ ડલ હોય એવી એક સામાન્ય છાપ છે. પરંતુ તમારું અંગ્રેજી ઘણું જ સારું જણાય છે તેનું કારણ શું છે ? શાળાની પચ્ચીસ વર્ષની કારકિર્દીમાં અંગ્રેજીનું આવું સોલિડ ઉત્તરપત્ર મેં ક્યારેય જોયું નથી.”
- શિક્ષણની સોનોગ્રાફી
