________________
તીર્થમાલા
હવે મેઘાશાએ પેલા પ્રતિમાજીને ધનરાજ નામના પોતાના સંબંધીને સોંપ્યા અને તે એની નિત્ય સેવાપૂજા કરવા લાગ્યો. આ રીતે બાર વરસ વહી ગયા. ત્યાર પછી એક રાત્રે અધિષ્ઠાયક દેવે-યક્ષે સ્વપ્નમાં આવીને મેઘાશાને કહ્યું : ‘તું કાલે પ્રભાતે વહેલો તૈયાર થજે અને ભાવલ નામના ચારણ પાસેથી વેલ માંગી લઈ અને તેને બે નાના બળદો જોડજે અને તેમાં શ્રી પાર્શ્વનાથની પ્રતિમા પધરાવીને તું જાતે જ એ વેલને હાંકળે. પાછું વળીને જોઈશ નહિ. તારે આ વેલને ‘થલવાડી' તરફ લઈ જવાની છે.'
મેઘાશા વિમાસણમાં પડ્યો. પણ યક્ષે કહ્યું તેમ કરવું જોઈએ. એટલે બીજા દિવસે સવારે તેણે વેલ જોડી. તેંમાં પેલા પ્રતિમાજી પધરાવ્યા અને જાતે જ તે વેલને હાંકવા લાગ્યો. રસ્તામાં એક ઉજ્જડ ગામ આવ્યું. ત્યાં મેઘાશાએ પાછું વળીને જોયું એટલે વેલ ત્યાં જ થંભી ગઈ. આગળ ચાલી નહિ.
આથી મેઘાશાને ઘણો પસ્તાવો થયો. પણ હવે શું થાય ? આખો દિવસ ગમગીનીમાં પસાર કરીને રાત્રે નિદ્રાધીન થયો. ત્યારે યક્ષે સ્વપ્નમાં કહ્યું : ‘કે આ ગોડીપુર નામનું ગામ છે. અહીંથી થોડે દૂર દક્ષિણ દિશામાં તાજું છાણ પડેલું છે. ત્યાં કૂવો ખોદાવીશ તો મીઠું પાણી નીકળશે. તેની નજીકમાં એક આકડો છે. ત્યાં ચોખાનો સાથિયો પૂરેલો છે. તેની નીચે ઘણું ધન દટાયેલું છે તે તું લઈ લેજે. વળી નજીકમાં પથ્થરની ખાણ છે. તેમાંથી પથ્થરો મંગાવી શિરોહીના સલાટો પાસે સારા સ્થાને એક સુંદર મંદિર બંધાવજે અને તેમાં આ પ્રતિમાજી પધરાવજે.
