________________
વિક્રમ સંવત ૧૮૧૦માં સુરતના શ્રી કચરાકીકા સંઘવીએ શ્રી શત્રુંજયનો સંઘ કાઢ્યો હતો અને ઘણા જિનબિંબોની પ્રતિષ્ઠા કરાવી હતી. ૧૮૧૧માં લીંબડીમાં સ્થિરતા કરી હતી. ૧૮૧૨માં શ્રીદેવચંદ્રજી રાજનગરમાં (અમદાવાદ) પધાર્યા. તેઓશ્રી દોશીવાડાની પોળમાં ડહેલાના ઉપાશ્રયે બિરાજતા હતા. ત્યારે વાયુપ્રકોપથી વમનાદિથી વ્યાધિ થતાં અસાતા વધતાં પોતાના શિષ્યોને બોલાવીને હિતશિક્ષા આપી. સં. ૧૮૧૨ના ભાદરવા વદી અમાવાસ્યાની રાત્રે એક પ્રહર રાત્રિ પસાર થતાં દશવૈકાલિક અને ઉત્તરાધ્યયન સૂત્રનું રટણ કરતા કરતા શ્રી દેવચંદ્રજી મહારજશ્રીએ દેહનો ત્યાગ કર્યો. અમદાવાદના હરિપુરામાં તેઓશ્રીનો અગ્નિસંસ્કાર કરવામાં આવ્યો. આજે પણ હરિપુરામાં તેઓશ્રીની ચરણ પાદુકાના દર્શન કરીને ચતુર્વિધ સંઘ પોતાની જાતને ધન્ય માને છે.
ઘણા ઘણા ગુણોથી અલંકૃત જીવનવાળા, અધ્યાત્મ પ્રેમી, અંતર્મુખી તથા સ્વરૂપલક્ષી જીવનવાળા આ મહાત્મા થયા. તેઓશ્રીની અનેક ઉત્તમ કૃતિમાંનું આ એક અધ્યાત્મ ગીતા નામનું નાનકડુ પણ અતિ ઉત્તમ શાસ્ત્ર બનાવ્યું.
સૌ કોઇ આ શાસ્ત્રનો અર્થ વારંવાર વાંચી- વિચારી જીવનમાં સતત તન્મય કરી શાશ્વત પદને પામો તે જ એક મંગલ મનિષા.
ફોનઃ (૦૨૬૧) ૨૭૬૩૦૦૦ મો. : ૯૮૯૮૩૩૦૮૩૫
-ધીરજલાલ ડાહ્યાલાલ મહેતા એ-૬૦૨, પાર્શ્વદર્શન કોમ્પ્લેક્ષ, નવયુગ કોલેજ સામે, રાંદેર રોડ, મું. સુરત (દક્ષિણ ગુજરાત)
