________________
આનંદઘન પદ
.
૧૦૮
૩૫૫
કાયાની માયામાં જીવે આવાં હિંસા, જૂઠ, ચોરી, મૈથુન, પરિગ્રહના પાપ સેવ્યા છે અને છતાં કાયા હવે એનું કાયાપણું છોડી રહી છે અને છૂટી જઈ રહી છે. જે કાયાની માયા કરી પાપાચાર કર્યાં તે કાયાને તો કોઈ માયા કે લાજશરમ નથી તો હવે એવી નિર્લજ્જ, બેશરમ, દગાખોર, વિનશ્ર્વર કાયાની માયા શા માટે રાખવી ? કાયા જ હવે કહી રહી છે કે મારી માયા છોડી પાપાચારના સેવન બંધ કરી પાંચ મહાવ્રત કે અણુવ્રત સ્વીકારી તું મારો આધાર લેવાનું છોડી દઈ તું તારાપણામાં આવ અને તારા નિરંજન, નિરાકાર, નિરાલંબ, નિરપેક્ષ, નિરાવરણપણાને પ્રાપ્ત કરી અશરીરી, અરૂપી, અમૂર્ત, અવિનાશીતાને પામ અને આજ વાત હવે યોગીરાજ કાયાના મુખથી જ આગળ ઉપર કહે છે.
(જીવ સૂણો યા રીત અનાદિ કહા કહત વારંવાર રે) - ચેતન વારંવાર આ રીતે બોલવાથી કાયાને ખીજ ચઢે છે અને તેથી ચેતનને વળતો પ્રહાર કરતાં કહે છે અરે ચેતન ! તારી ચુતરાઈને આટલો સમય લગી કોને ત્યાં ગિરવે રાખી હતી ? તને આટલું પણ ભાન આખી જિંદગીમાં કેમ ન આવ્યું ? અરે ભાન વિનાના ! તારી મુર્ખાઈનું પ્રદર્શન અંત સમયે મારી આગળ કરી રહ્યો છે. હું તો પ્રકૃતિએ રચેલ નિર્જીવ માયાનું પુતળું છું. હું તો પ્રકૃતિની રીત પ્રમાણેજ વર્તુ છું. મારા માલિકને હું કયારે પણ બેવફા બની નથી. તેં તારા માલિકને છેતર્યો છે. તું ચતુર થઈને ચૂકયો છું - પૂજાની ઢાળમાં પણ આજ વાત દોહરાવી છે કે....
-
ચેતન ચતુર થઈ ચૂક્યો
નિજ ગુણ મોહ વશે મૂક્યો - ચેતન....
અરે જીવ ! સાંભળ, પ્રકૃતિનો આ અનાદિનો નિયમ અથવા ન્યાય તને કેમ આજ દિ' સુધી ન ઓળખાયો ? તારો ધર્મ અને મારો ધર્મ હંમેશા જુદો જ છે. હું કયારે પણ કોઈની સાથે ગઈજ નથી અને જવાની પણ નથી.
(પાપ પુન્ય દોય લાહે) - મારી ખાતર જીવનમાં તે જે કાંઈ સારી કે ખોટી કરણી કરી હશે તેનાથી બંધાયેલ પુન્ય પાપ ભોગવવા તારેજ જવુ પડશે. આમ કાયાએ ચેતનને બોલતો બંધ કરી દીધો.
હું જ નહિ પણ વિશ્વ આખુંય અકર્તા છે એવા ભાવથી જ જગતને નિર્દોષ જોવાશે.
