________________
23
“પર” અને “સ્વ” નો ભેદ પામી અંતે અનંતગુણ સ્વરૂપ આત્માને સિદ્ધ સ્વરૂપે સાદિ અનંત સુખનો ભોકતા બનાવવા માટે આ જન્મ - જીવન અને સાધના તેમજ આરાધના.... આ સઘળાંની સાર્થકતા પામી કૃતકૃત્યતાને વરવાની છે.
ઉપકારીઓના ઉપકારના બળે અને કરૂણાળુઓની કરૂણાના તળે આવેલા આત્મા આ માર્ગને સહજ રૂપે પામી સ્વ-સ્વરૂપમાં લીન બને છે. આ નિર્વિવાદ વસ્તુ છે... અનુભવના મર્મી અને ધર્મી આત્માઓ આ કાર્યમાં આનંદઘનજી જેવા મહાપુરુષની જેમ આનંદ-જાત્રામાં જોડાઈને તેમનાં પદો દ્વારા તેમનાં પગલે ચાલી આ કાર્ય જરૂરથી કરી શકશે. માટે જ તો આ મહામૂલો પ્રયાસ પૂ. પંન્યાસજી મ.સા. તથા ભાઈશ્રી સૂર્યવદનભાઈએ કરેલ છે. ખરેખર ! અનુમોદનને પાત્ર છે; પ્રસંશનીય છે; સરાહનીય છે.
પૂ. પંન્યાસજીનાં પરિચયમાં વર્ષોથી હું છું. અમારે ઘણી જ ચર્ચા-વિચારણા સાથે થયેલ છે. કલાકોના કલાકો અને દિવસોના દિવસો. આ નિશ્ચય અને વ્યવહાર તેમજ આત્માનુભવ અને આત્મરતિ - આત્મપ્રીતિ અંગે તેમજ જ્ઞાતા-દષ્ટા અને સાક્ષીભાવ અંગેની વાતોના રહસ્યો અંગે તેમજ અગમ-નિગમ અને આગમ તથા અધ્યાત્મ અને યોગ ધ્યાનનાં વિષયમાં તેમનું જીવન જે રીતે વહી રહ્યું છે. તે વાત હું નિ:શંક રીતે કહી શકું તેમ છું. મેં તે વાત જાણી છે. અને ચોકસાઈ કરી છે. આવા અનુભવના માણીગરો આજે વિરલા અને હીરલા ગણી શકાય. અંતમાં તેમની આ અંતરયાત્રા... પરમપદ સુધી પહોંચે એવી અંતરની અભિલાષા સહ વિરમું છું.
- પંડિતવર્ય શ્રી પૂનમચંદભાઈ કે. શાહ
ગોરેગાંવ સં. ૨૦૧૨, ચૈત્ર સુદ 9, સોમવાર, તા. ૩-૪-૨૦૦૬.
