________________
૨૦
મહપ્રભુ વલ્લભાચાર્યજી એને વૈષ્ણવ ધર્મની દીક્ષા આપી. રાજાએ એક સોનાના થાળમાં એક હજાર સોનામહોર ભેટ ધરી, આચાર્યચરણે તેમાંથી કેવળ સાત સોનામહોર લીધી. જેમાંથી સાડા ત્રણ સોનામહોરનાં ગિરિરાજમાં શ્રીનાથજીનાં નૂપુર અને બાકી રહેલી સાડા ત્રણ સોનામહોરમાંથી પંઢરપુરમાં યાત્રાએ આવેલા, આચાર્યચરણે વિઠ્ઠલનાથ ઠાકોરજીની સોનાની કટિમેખલા બનાવી. બાકી રહેલા દ્રવ્યમાંથી અડધું દ્રવ્ય પિતાના સમયનું દેવું ચૂકવવા માતાને આપ્યું અને બાકીનું દ્રવ્ય યજ્ઞયાગ માટે જુદું મુકાવી દીધું.
વિજયનગરથી નીકળી, દક્ષિણનાં તીર્થોની યાત્રા કરી. સ્થળે સ્થળે વિદ્વાનો સાથે શાસ્ત્રાર્થ દ્વારા પોતાના સિદ્ધાંતની, ભક્તિમાર્ગની સ્થાપના કરી. વલ્લભાચાર્યની વિદ્વત્તા અને અલૌકિકતાથી પ્રભાવિત થઈ, પંડિતો અને સમાજના અનેક લોકો તેમના શિષ્ય બનવા લાગ્યા.
દક્ષિણની યાત્રા પૂર્ણ કરી એક વખત વલ્લભાચાર્ય પશ્ચિમની યાત્રાએ પધાર્યા. જ્યાં ભક્તિના પ્રચાર દ્વારા અનેક લોકોનો ઉદ્ધાર કર્યો. એ સમયે દ્વારકામાં સંન્યાસીઓ સાથે ગીતા ઉપર વલ્લભાચાર્યનો ઘણા દિવસો સુધી શાસ્ત્રાર્થ થયો. અંતમાં, આચાર્યચરણને વિજય પ્રાપ્ત થયો. તેમણે ગીતાનું વાસ્તવિક રહસ્ય સમજાવ્યું.
ત્યાર બાદ પશ્ચિમની યાત્રા પૂરી કરી, સંવત ૧૫૬૮ના જેષ્ઠ માસમાં બદરિકાશ્રમમાં શ્રીવલ્લભાચાર્ય પધાર્યા. અહીંનાં બધાં સ્થાનોમાં પોતાનો પ્રચાર કર્યો અને કેટલાક દિવસ રોકાઈ, સુબોધિનીજીનું પ્રવચન કર્યું. વ્યાસાશ્રમમાં એક દિવસ ઓચિંતા ભગવાન વ્યાસનાં દર્શન વલ્લભાચાર્યને થયાં. પોતાના મનની
