________________
હજરત મહંમદ અને ઇસ્લામ વરકા નામનો ખદીજાનો એક સગો યહદી અને ખ્રિસ્તી ધર્મપુસ્તકોનો પ્રખ્યાત વિદ્વાન હતો. તે બહુ વૃદ્ધ અને અંધ હતો. આજુબાજુના લોકો તેના તરફ આદરની દૃષ્ટિએ જોતા હતા. ખદીજા તરત વરકા પાસે ગઈ અને તેને બધી વાત કહી સંભળાવી. વરકાએ ધ્યાનપૂર્વક બધું સાંભળીને કહ્યું કે, “ધર્મગ્રંથોમાં આવા જ એક સમયે આવા પેગંબરને મોકલવા વિશેનો ઉલ્લેખ છે. ખરેખર જે દૂત હજરત મૂસા પાસે આવ્યો હતો તે જ મહંમદ પાસે પણ આવ્યો છે. મહંમદને કહો કે ગભરાય નહીં અને હિંમતપૂર્વક પોતાનું મિશન પૂરું કરે.”
વિદ્વાન વરકાએ દિલાસો આપ્યો તેની મહંમદસાહેબ પર ઘણી અસર થઈ. છતાં તેઓ મેલાંઘેલાં કપડાં પહેરીને, ઊંડું ચિંતન કરતા એક ચાદર વીંટીને પડી રહેતા. છ મહિનાની ભારે બેચેની પછી એક દિવસ ફરીથી અવાજ સંભળાયો:
એ ચાદરમાં વીંટાયેલા, ઊઠ અને લોકોને ચેતાવ, અને તારા પ્રભુના મહિમાનું વર્ણન કર, અને તારાં વસ્ત્ર સાફ કર, અને અસ્વચ્છતાથી દૂર રહે, અને બીજાઓની સેવા કરી હોય તો તેનો ઉપકાર ગણાવીશ
નહીં,
અને તારા પ્રભુને ખાતર ધીરજથી કામ લે.
-
૧. કુરાન,૭૪, ૧-૭.
