________________
જીવન તો સાક્ષાત અનુભૂતિ કરાવતું વ્યવહારિક જીવન છે. તેનો વ્યવહાર અને તેની જ્ઞાનદશા બંને નિર્મળ હોવા જોઈએ. ફકત વાચામાં આધ્યાત્મિકભાવોની ચર્ચા કરી જીવ મોહાત્મકદશામાં રમતો હોય તે સિદ્ધિકારને ઈષ્ટ નથી, એટલું જ નહીં પરંતુ સ્વયં આત્માને માટે અને સમાજને માટે પણ અનર્થકારી છે. આમ આ ગાથામાં છેલ્લા પદમાં કટાક્ષ કરીને સાધકની વાસ્તવિક દશાનું વર્ણન કર્યું છે અને હવે આગળની ગાથામાં સિદ્ધિકાર સ્વયં કહેવા માંગે છે કે અમે જે માર્ગનું નિર્ધારણ કર્યું છે, તે માર્ગને છ ભાગમાં વિભકત કરી તેના પાંચ સ્થાનકની યાત્રા પૂરી કરી, હવે અંતિમ યાત્રાના લક્ષબિંદુને પ્રાપ્ત કરવાનું છે, તો હવે આપણે તે ગાથાનો ઉપોદઘાત કરીએ.