________________
સંપૂજ્ય પિતામહ શ્યામદેવ સ્વામીજીનું
- જીવન કવન પિતામહ પરમ પૂજ્ય સ્વામીશ્રી શ્યામદેવનો જન્મ વિ.સં. ૧૯૭૭ના કાર્તિકી પૂર્ણિમાના મહાન દિવસે ભાવનગર જિલ્લાના ઉમરાળા ગામે થયેલ કે જે પૂજ્ય સદ્ગુરુદેવશ્રી કાનજીસ્વામીની પણ જન્મભૂમિ છે. પવિત્ર પ્રભુપરાયણ પિતા વજેરામ અને માતા પ્રેમબાના તે લાડલા સંતાન હતા.
જાણે કોઈ યોગભ્રષ્ટ આત્મા અધૂરી યોગસાધનાને આગળ વધારવા આ યોગભૂમિ પર અવતર્યો હોય, એમ બાળપણથી જ સ્વામીજીનું વલણ પ્રભુભક્તિનું હતું. જ્યાં જ્યાં ભજન-કીર્તન થતાં ત્યાં ત્યાં તેઓ જતા. ઈશ્વર વિષેની જાણકારી તથા આત્મસાક્ષાત્કાર માટે ઝુરાપો હતો. યોગાનુયોગ કોઈ અવસરે “સત્યવાદી હરિશ્ચંદ્ર નાટક જોવાનો પ્રસંગ આવ્યો તો એ નાટકના પ્રભાવે એમની સત્યની શોધની તાલાવેલી એટલી વધતી ગઈ કે નિદ્રામાં પણ સત્ય! સત્યાના ઉચ્ચારણો થઈ જતા. માતાએ તે સાંભળતા એની ચોખવટ એમની સાથેય કરવી પડી હતી.
સાત વર્ષની વયે નિશાળમાં અભ્યાસ કરવા દાખલ કર્યા. સ્વભાવે નિડર અને અભ્યાસમાં ખંતીલા હોવાથી શાળામાં શિક્ષકો તથા અન્ય વિદ્યાર્થીઓમાં પ્રિય થઈ ગયા. શાળામાં તેઓશ્રીની છાપ ઉત્સાહી હોંશિયાર વિદ્યાર્થીરૂપે હતી. પિતાશ્રીનું અવસાન થતાં ચાર વર્ષના અભ્યાસ બાદ શાળા છોડી દઈને અગિયાર વર્ષની વયે તો પરિવારની જવાબદારી માથે આવી પડતાં વ્યવસાયમાં જોડાવું પડ્યું.