________________
પ્રેમ અમાપ એ મદમાતી ભરવાડણ દૂધનું બોઘરણું ભરી રોજ શહેરમાં વેચવા જતી. માર્ગમાં એના પ્રિયતમનું ખેતર આવતું. ત્યાં ઘેઘૂર વડલા નીચે બેસી બે ઘડી બન્ને પ્રેમગોષ્ઠિ કરતાં. જતાં જતાં એ પેલાનો લોટો દૂધથી છલકાવતી જતી. બાકીના દૂધને વેચી એ પાછી વળતી.
આજ પાછા વળતાં એની સખી મળી. એણે પૂછયું: “કેટલાનું દૂધ વેચ્યું?”
“સાત રૂપિયાનું” “અને તારા પરણ્યાને કેટલું પાયું?”
એણે મલકાઇને ઉત્તર વાળ્યો: “એ તે કાંઈ માપવાનું હોય? પ્રેમમાં પૈસાની ગણત્રી શી?”
આ વાત માળા ગણતા એક સંતે સાંભળી અને બોલ્યા: “તો પછી પ્રભુની પ્રેમજન્ય ચિત્તપ્રસન્નતાને તો પૈસાથી કે પારાથી મપાય જ કેમ?” *
