________________
પ્રભાતનો પરાગ
આત્મામાં અનંત શકિતઓ છે એમ આપણે સાંભળીએ છીએ. પણ આત્મા અરૂપી હોઈ એને આપણે ચર્મચક્ષુથી જોઈ શકતા નથી કે દર્શન કરી શકતા નથી. પણ જયારે વિવિધ શક્તિઓથી ભરેલી કોઈ -વિશિષ્ટ વ્યકિતનાં દર્શન થાય છે ત્યારે આપણને પ્રતીતિ થાય છે કે આત્મા અનંત શકિતઓનો સ્વામી છે.
એવી જ અનુભૂતિ મને પૂ. ચંદ્રપ્રભસાગરજી (ચિત્રભાનુ) મહારાજનાં દર્શને થઈ. વિદ્વતા, પ્રતિભા, વકતૃત્વ, ચિન્તન, લેખન અને આધ્યાત્મિક સાધનાથી નીતરતું માધુર્ય–આ બધી શક્તિઓને એક સંપથી પૂજ્યશ્રીમાં એક સાથે વસેલી જોઈ મારું મસ્તક શકિતઓના આ સ્વામીને નમી પડયું.
એમણે પોતાના પ્રભાવશાળી વ્યક્તિત્વથી અમારા જેવાં લાખો યુવક-યુવતીઓને પ્રેરણા આપી જાગૃતિના પ્રભાતમાં ખેંચ્યું છે. મુંબઈની વિદ્યાપીઠો,કોલેજો, મહાવિદ્યાલયો અને શાળાઓમાં એમના શબ્દ ગુંજી રહ્યા છે. એમને સાંભળવા યુવક વર્ગ આતુરતાથી રાહ જુએ છે.
