________________
૮૦
સૂત્ર સંવેદના
મારે ત્યાં આહાર-પાણી વહોરવા પધારી લાભ આપવા કૃપા કરશોજી. ભાત-પાણીના ગ્રહણ દ્વારા ઉપલક્ષણથી પ્રાસુક એવા વસ્ત્ર, પાત્ર, કંબલ, ઔષધ, રજોહરણ વગેરેનું ગ્રહણ કરવું.
આ સાંભળી ગુરુ “વર્તમાન જોગ” કહે, અર્થાતુ જ્યારે ભાત-પાણીનો અવસર આવશે, ત્યારે અમારી અનુકૂળતા પ્રમાણે કરશું. એટલે કે, અત્યારે તો ભાત-પાણીનો સમય ભાવિરૂ૫ છે. અર્થાતુ હમણાં ભાત-પાણી વહોરવા જવાનું નથી. હવે જો એ ભાવિમાં થવાની વાતમાં અત્યારથી હા કે ના કહે તો કોઈ આપત્તિ આવે અથવા કોઈ સંયોગો બદલાઈ જાય અને ભાત-પાણી વહોરવા ન પણ જવાય, તો આપેલું વચન મિથ્યા થાય, તેથી મૃષાવાદનો દોષ લાગે. આવું ન થાય તે માટે “વર્તમાન જોગ” એવો શબ્દ વપરાય છે. એટલે કે, ભાત-પાણી વહોરવાનો ભાવિકાળ જ્યારે વર્તમાનકાળ બનશે, તે વખતે જેમ યોગ્ય લાગશે તેમ કરશું.
