________________
વિકટ સ્થિતિ વચ્ચે વિરાટ મનોબળ હારે શેનું ? ચાલો હવે આપણે ઇન્દ્રવદનની વિકટ વિકાસ યાત્રાના હમસફર બનીએ. “વર્ધમાનને પ્રભુ મહાવીર બનવાનું છે.” તે વાત ગર્ભની પ્રથમપળથી જ નિશ્ચિત હતી. માટે એમ કહી શકાય કે વર્ધમાન, મહાવીર બનવાની યોજનાને સમયે સમયે આગળ વધારતા રહે છે. વર્ધમાનનો પ્રભુ મહાવીર બનવાનો પ્રવાસ રિઝર્વેશન સાથેનો હતો. વિકટ હોવા છતાં નિશ્ચિત હતો. મંજિલ તરફ જ તેમના કદમ હતા.
વર્ધમાન તે ગણિતનો દાખલો છે, તો પરમાત્મા મહાવીર દેવ તે જવાબ છે.'
પણ ઊભા રહો, ઇન્દ્રવદનમાંથી મુનિ ચન્દ્રશેખરવિજય તરીકેનો પ્રવાસ, પ્રવાસ ન હતો પણ ખોજ હતી. “ઇન્દ્રવદનમાં ચન્દ્રશેખરવિજય બનવાનું નક્કી જ હતું.” તેવું કહેવું દુષ્કર છે. માટે આ પ્રવાસ અનિશ્ચિત ગન્તવ્યનો હતો, તેથી જ ખોજ છે અને તેથી જ આ યાત્રા વિકટ છે. યાદ રહે અહીં વિજય પ્રાપ્તિ માટે પરાક્રમ છે, પણ વિજય નિશ્ચિત નથી.
રાધનપુર નિવાસી પ્રતાપસીભાઈનો પરિવારમાં બે, દિકરા, જીવાભાઈ બાપાજી અને કાન્તીભાઈ પિતાજીનો પરિવાર ખૂબ સંસ્કારી જેના પરિવાર હતો. ચુસ્ત જૈન સંસ્કારોથી વસત તે પરિવારની જીવન શૈલી હતી, અને પૂજ્યપાદ પ્રેમસૂરીશ્વરજી મ.સા. તથા પૂજયપાદ રામચન્દ્રસૂરીશ્વરજી મ.સા.ના સત્સંગમાં વસનારો આ પરિવાર હતો. જોકે જૈન ધર્મના પ્રારંભિક સંસ્કાર તેમના જીવનમાં પૂજ્યપાદ વલ્લભસૂરીશ્વરજી મ.સા.ના કારણે પ્રવેશ્યા હતા. રાધનપુરના રહીશ જીવાભાઈ શેઠ વલ્લભસૂરિજી મ.સા.ના સત્સંગમાં આવેલા હતા તેથી સંસ્કાર અને સત્સંગનો સંયોગ, તે પરિવારનાં સાતેય સંતાનોને પ્રાપ્ત થયો હતો.
પણ સબૂર ! સંસ્કાર અને સત્સંગ સાતેય પાસે હોવા છતાં ચન્દ્રશેખરવિજય અને સાધ્વી મહાનંદાશ્રી, બે જ સંત બને છે બાકીના પાંચ સાંસારિક જીવનને વરે છે.