________________
૩૯
ધામના ધબકારાની શરૂઆત
યુવાનોના ઉત્સાહને મુંબઈના જૈનસંઘો માટે ગતિશીલ કરવા “વર્ધમાન સંસ્કૃતિધામ” નામની સંસ્થાની પૂ. ગુરુદેવની નિશ્રામાં સ્થાપના થઈ. તે સંસ્થા પ્રારંભમાં યોગેશના પાર્લાના નાનકડા ઘરમાં ચાલુ થઈ હતી. ત્યારબાદ વિ. સં. ૨૦૩૪ની સાલમાં જ પૂ. ગુરુદેવ મુંબઈથી વિહાર કરીને પુના તરફ જાય છે. પુના જતા જતા જ પૂ. ગુરુદેવે એવું મન બનાવી લીધુ કે “મુંબઈ વિલાસ પ્રચૂર છે. મુંબઈના યુવાનો પાસે અપેક્ષા રાખવી અનુચિત છે. માટે આ વરસે આપણે પુનામાં જ ક્યાંક ચોમાસુ કરી લઈશું.” પુના પહોંચે છે, ઉરલીકાંચન નેચરોપથી સેન્ટરમાં થોડા દિ' ગાળે છે. ત્યારે મુંબઈથી યોગેશ મ. શાહનો પત્ર પૂ. ગુરુદેવ ઉપર આવે છે. તે વખતે પૂ.ગુરુદેવ સાથે તેવો નિકટનો સંબંધ યોગેશને ન હતો. પણ તેના હૃદયમાં પૂ. ગુરુદેવ માટે તીવ્ર આકર્ષણ જરૂર હતું. તેથી તે પત્રમાં યોગેશે પૂ. ગુરુદેવને ખાસ દર્દભરી પોતાની વ્યથા અને વિનંતી કરી હતી કે “ગુરુદેવ! આપની નિશ્રામાં ધામ શરૂ થયું છે. મુંબઈના અમે યુવાનો આપના મિશનને આગળ ધપાવશું, પણ અમારી શરત છે. કે “આપની હાજરી મુંબઈમાં જ હોવી જોઈએ''. પૂ. ગુરુદેવે યોગેશના પત્રમાં શ્રદ્ધા અને આગને જોઈ, તેથી પૂ. ગુરુદેવ પુનઃ મુંબઈ પધારે છે. વિ.સં. ૨૦૩૪નું ચાતુર્માસ ભાયખાલા ખાતે કેવલ યુવાનોને ધર્મ સન્મુખ કરવાના આશયથી જ ગોઠવાયું હતું. તે ચાતુર્માસ દરમ્યાનમાં સત્સંગનું લેટેસ્ટ વર્ઝન અપલોડ થયું. જેના દ્વારા માત્ર યુવાનોને જ જોડી શકાય. યુવાનો પાપી હોવા છતાં દંભી ન હતા. આ જ કારણથી તેઓ માટે સત્સંગનું નવું માળખું રજૂ થયું.
૧૦૩
