________________
૧૬૦
નવતત્વ પ્રકરણ | મૂલ
श्री नवतत्त्व प्रकरण
जीवाऽजीवा पुण्णं, पावाऽऽसव संवरो य निज्जरणा । बन्धो मुक्खो य तहा, नवतत्ता हुंति नायव्वा ।।१।। चउदस चउदस बायालीसा, बासी अ हुंति बायाला । सत्तावन्नं बारस, चउ नव भेया कमेणेसिं ।।२।। एगविह दुविह तिविहा, चउब्विहा पंच छविहा जीवा । चेयण-तस-इयरेहिं, वेय-गई-करण-काएहिं ।।३।। एगिदिय सुहुमियरा, सनियर पणिंदिया य सबितिचउ । अपज्जत्ता पज्जत्ता, कमेण चउदस जियट्ठाणा ।।४।। नाणं च दंसणं चेव, चरित्तं च तवो तहा । वीरियं उवओगो य, एवं जीअस्स लक्खणं ।।५।। आहारसरीरिंदियपज्जत्ती आणपाणभासमणे । चउ पंच पंच छप्पि य, इगविगलाऽसन्निसनीणं ।।६।। पणिंदिअत्तिबलूसासाउ दस पाण चउ छ सग अट्ठ । इग-दु-ति-चउरिंदीणं, असनि-सन्नीणं नव दस य ।।७।। धम्माधम्मागासा, तिय-तिय-भेया तहेव अद्धा य । खंधा देस पएसा, परमाणु अजीव चउदसहा ।।८।। धम्माऽधम्मा पुग्गल, नह कालो पंच हुंति अज्जीवा । चलणसहावो धम्मो, थिरसंठाणो अहम्मो य ।।९।। अवगाहो आगासं, पुग्गलजीवाण पुग्गला चउहा । खंधा देस पएसा, परमाणु चेव नायव्वा ।।१०।।
Jain Education International
For Personal & Private Use Only
www.jainelibrary.org
