________________ 157 . भवभावना(८) जसकित्तिकरं नाणं गुणसयसंपायगं जए नाणं / आणावि जिणाणेसा पढमं नाणं तओ चरणं // 504 // ते पुज्जा तियलोए सव्वत्थवि जाण निम्मलं नाणं / पुजाणवि पुज्जयरा नाणी य चरित्तजुत्ता य // 505 // भद्धं बहुस्सुयाणं बहुजणसंदेहपुच्छणिज्जाणं / उज्जोइयभुवणाणं झीणम्मिवि केवलमयंके // 506 // जेसिं च फुरइ नाणं ममत्तनेहाणुबंधभावेहिं / वाहिजंति न कहमवि मणम्मि एवं विभावेंता // 507 / / जरमरणसमं न भयं न दुहं नरगाइजम्मओ अन्नं / तो जम्ममरणजरमूलकारणं छिंदसु ममत्तं // 508 // जावइयं किंपि दुहं सारीरं माणसं च संसारे / एत्तो अणंतखुत्तो विहवाइममत्तदोसेण // 509 / / कुणसि ममत्तं धणसयणविहवपमुहेसुऽणंतदुःखेसु / सिढिलेसि आयरं पुण अणंतसोक्खम्मि मोक्खम्मि // 510 // संसारो दुहहेऊ दुक्खफलो दुसहदुक्खरूवो य / नेहनियलेहिं बद्धा न चयंति तहावि तं जीवा / / 511 // . जह न तरइ आरुहिउँ पंके खुत्तो करी थलं कहवि / तह नेहपंकखुत्तो जीवो नारुहइ धम्मथलं // 512 // छिज्जं सोसं मलणं दाहं निप्पीलणं च लोयम्मि / जीवा तिला य पेच्छह पावंति सिणेहसंबद्धा / / 513 // दूरुज्झियमज्जाया धम्मविरुद्धं च जणविरुद्धं च / किमकज्जं तं जीवा न कुणंति सिणेहपडिबद्धा ? // 514 //
