________________ उचियत्तं पूयाए विसेसकरणं तु मूलबिंबस्स / जं पडइ तत्थ पढमं जणस्स दिट्ठी सह मणेणं // 60 // (नोदक:) पूआ वंदणमाइ काऊणेगस्स सेसकरणम्मि / नायगसेवगभावो होइ कओ लोगनाहाणं // 61 // एगस्सायरसारा कीरइ पूआवरेसि थोवयरी / एसा वि महावण्णा लक्खिज्जइ थूलबुद्धीहिं // 62 / / (आचार्य आह) नायगसेवगबुद्धी न होइ एअस्स नायगजणस्स / पिच्छंतस्स समाणं परिवारं पाडिहेराई // 63 // ववहारे पुण पढमं पइट्ठिओ मूलनायगो एसो / अवणिज्जइ सेसाणं नायगभावो न उण तेसिं // 64 // जम्हा सिद्धसहावो तुल्लो सव्वेसिमित्थ उवयारो / अत्तप्पभूरिभत्ती किच्चो भिच्चो सरइ अहवा // 65 // तम्हा वंदणपूयणबलिमुहेसु एगस्स कीरमाणेसु / आसायणा न दिट्ठा उचियपवित्तस्स पुरिसस्स // 66 // जह मिम्मयपडिमाणं पूया पुप्फाइएहिं खलु उचिया / कणगाइनिम्मियाणं उचियतमा मज्जणाई वि // 67 // कल्लाणगाइकज्जा एगस्स विसेसपूअकरणे वि। नावन्नापरिणामो जह धम्मिजणस्स सेसेसु // 68 // उचियपवित्ती एवं जहा कुणंतस्स होइ नायव्वा / तह मूलबिंबपूया-विसेसकरणे वि तं नत्थि // 69 // जिणभवणबिंबपूया कीरंति जिणाण नो कए किंतु / सुहभावणानिमित्तं बुहाण इयराण बोहत्थं // 70 // चेइहरेण केइ पसंतरूबेण केइ बिंबेण / पूयाईसया अन्ने अन्ने बुझंति उवएसा // 71 // 149
