________________ एक्को वि नमोक्कारो सम्मकतो सम्मभावतो चेव / तारेयऽवड्ढपोग्गलमज्झे नियमेण, कह णु थुती ? // 888 // ण य इह तवचरणाणं न दीसई कम्मलहुगया जेण / तेणं दिट्ठत्थे वि हु न विरुज्झइ हंत जिणवयणं // 889 // आरोगबोहिलाभं समाधिवरमुत्तमं च मे दितु / जह एत्थं तदभावो इहेव तह चेव तेसि पि // 890 // भासा असच्चमोसा परिणामविसुद्धिकारणं एसा / उत्तमफलविसया तो भणिता वि तई न दोसाय // 891 // हेयोवादाणाओ संसारनिबंधणाओ वेदस्स / तह यापउरिसभावा ण य वीवाहादिया एवं // 892 // ण य कुच्छिया तई जं भणियं तं सव्वहा. अजुत्तं तु / / नाणीहिं कुच्छिय च्चिय तहेवं वेदंतवादीहिं // 893 // अंधम्मि तमम्मि खलु मज्जामो पसुहिं जे जयामो त्ति / एमादि बहुविहं किं भणियं वेदंतवादीहिं // 894 // एतेणं यजमाणा बुहे पडुच्चा ण लोगपुज्ज त्ति / अबुहाणं पुण पुज्जा मंडलगाई वि किं तेहिं ? // 895 / / अन्ने उ मुसावाओ नियनिंदाकारणं न दोसाय / जह बंभघातगोऽहं एमादि पभासयन्तस्स // 896 // दोसाणमब्भुवगमे अक्कोसाणं च विसहणे सम्म / होति जितोऽजितपुव्वो भवतरुहेतू अहंकारो // 897 // एवमिदमकातव्वं वेरग्गनिबंधणं च अन्नेसिं / जायइ सो इय सपरुवगारातो चेव कह दोसो ? // 898 // इय दोसाणऽब्भुवगमे अविज्जमाणाणमत्तदोसातो / अक्कोसे परबंधा इय अन्नाणा कहमदोसो ? // 899 // 05
