________________ 618 अंग-पविट्ट सुत्ताणि / धारणा सिया जहा से तत्थ जीए सिया जीएणं ववहारं पट्टवेज्जा / इच्चेएहि पंचहि ववहारं पट्टवेज्जा, तंजहा-आगमेणं, सुएणं, आणाए, धारणाए, नीएणं, जहा 2 से आगमे सुए आणा धारणा जीए तहा 2 ववहारं पट्टवेज्जा / से किमाहु भंते ! आगमबलिया सपणा णिग्गंथा इच्चेयं पंचविहं ववहारं जया 2 जहि 2 तहा 2 तहि 2 अणिस्सिओवसियं सम्मं ववहरमाणे समणे णिग्गंथे आणाए आराहए भवइ // 336 // कइविहे गं भंते ! बंधे पण्णत्ते ? गोयमा ! दुविहे बंधे पण्णत्ते, तंजहा-इरियावहियबंधे य संपराइयबंधे य / इरियावहियण्णं भंते ! कम्मं कि णेरइओ बंधइ तिरिक्खजोणिओ बंधइ तिरिक्खजोगिणी बंधइ मणुस्सो बंधइ मणुस्सी बंधइ देवो बंधइ देवी बंधइ ? गोयमा ! णो रइओ बंधइ णो तिरिक्खजोणिओ बंध इ णो तिरिक्खजोणिणी बंधइ णो देवो बंधइ णो देवी बंधइ, पुव्वपडिवण्णए पडुच्च मणुस्सा य मणुस्सीओ य बंधति, पडिवज्जमाणए पडुच्च मणुस्सो वा बंधइ 1 मणुस्सी वा बंधइ 2 मणुस्सा वा बंधंति 3 मणुस्सीओ वा बंधंति 4 अहवा मणुस्सो य मणुस्सी य बंधइ 5 अहवा मणुस्सो य मणुस्सीओ य बंधति 6 अहवा मणुस्सा य मणुस्सी य बंधइ 7 अहवा मणुस्सो य मणुस्सीओ य बंधति / तं भंते ! कि इत्थी बंधइ पुरिसो बंधइ णपुंसगो बंधइ, इत्थीओ बंधंति पुरिसा बंधति णपुंसगा बंधंति, णोइस्थिणोपुरिसोणोणपुंसओ बंधइ ? गोयमा! णो इत्थी बंधइ णो पुरिसो बंधइ जाव णो णपुंसगा बंधइ, पुवपडिवण्णए पडुच्च अवगयवेया बंधंति, पडिवज्जमाणए पडुच्च अवगयवेओ वा बंधइ अवगयवेया वा बंधति / जइ भंते ! अवगयवेओ वा बंधइ अवगयवेया वा बंधंति तं भंते ! कि इत्थीपच्छाकडो बंधइ 1 पुरिसपच्छाकडो बंधइ 2 णपुंसगपच्छाकडो बंधइ 3 इत्थीपच्छाकडा वंधति 4 पुरिसपच्छाकडा बंधंति 5 णपुंसगपच्छाकडा बंधंति 6 उदाहु इत्थिपच्छाकडो य पुरिसपच्छाकडो य बंधइ, उदाहु इत्थिपच्छाकडो य पुरिसपच्छाकडा य बधति, उदाहु इत्थिपच्छाकडा य पुरिसपच्छाकडो य बंधइ, उदाहु इस्थिपच्छा. कडा य पुरिसपच्छाकडा य बंधति, उदाहु इत्थीपच्छाकडो य णपुंसगपच्छाकडो य बंधइ 4 उदाहु पुरिसपच्छाकडो य णपुंसगपच्छाकडो य बंधइ 4 उदाहु इत्थिपच्छाकडो य पुरिसपच्छाकडो य णपुंसगपच्छाकडो यं बंधइ 8, एवं एए छन्वीसं भंगा 26 जाव उदाहु इत्थीपच्छाकडा य पुरिसप० णपुंसगप० बंधति ?
