________________ आयारो सु. 2 अ. 1 उ.७ 45 असणं वा 4 अफासुयं लाभे संते णो पडिगाहिज्जा, केवली बूया, “आयाणमेयं'' असंजए भिक्खुपडियाए उस्सिंचमाणे वा, णिस्सिंचमाणे वा, आमज्जमाणे का, पमज्जमाणे वा, ओयारेमाणे वा, उव्वत्तमाणे वा, अगणिजीवे हि सिज्जा, अह भिक्खूणं पुव्वोवदिट्ठा एस पइण्णा, एस हेऊ, एस कारणे, एसुवएसे, ज तहप्पगारं असणं वा, 4 अगणिणिखित्तं अफासुयं अणेसणिज्जं लाभे संते णो पडिगाहिज्जा // 591 / / एवं खलु तस्स भिक्खुस्स वा भिक्खुणीए वा सामग्गियं // 592 // पढमं अज्झयणं छट्ठोद्देसो समत्तो // से भिक्खू वा 2 जाव समाणे से जं पुण जाणेज्जा असणं वा 4 खंधंसि वा थंभसि वा, मंचंसि वा, मालसि वा, पासायंसि वा, हम्मियतलंसि वा, अण्णयरंसि वा, तहप्पगारंसि अंतलिक्खजायंसि उवणिक्खित्ते सिया, तहप्पगारं मालोहडं असणं वा 4 अफासुयं जाव णो पडिगाहिज्जा, केवली बूया " आयाणमेयं" असंजए भिक्खुपडियाए पीढं वा फलग वा णिस्सेणिं वा, उदूहलं वा, आहट्ट उस्सविय दुरुहेज्जा, से तत्थ दुरुहमाणे, पयलेज्ज वा पवडेज्ज वा से तत्थ पयलेमाणे वा पवडेमाणे वा, हत्थं वा, पायं वा, बाहुं वा, उरुं वा, उदरं वा, सीसं वा अण्णयरं वा कायंसि इंदियजायं लूसिज वा, पाणाणि वा, भूयाणि वा, जीवाणि वा, सत्ताणि वा, अभिहणिज्ज वा, वित्तासिज्ज वा, लेसिज्ज वा, संघसिज्ज वा, संघट्टिज्ज वा, परियाविज्ज वा, किलामिज वा, ठाणाओ ठाणं संकामिज वा, तं तहप्पगारं मालोहडं असणं वा, 4 लाभे संते णो पडिगाहिज्जा // 593 // से भिक्खू वा, 2 जाव समाणे से जं पुण जाणेज्जा, असणं वा 4 कुट्ठियाओ वा कोलेज्जाओ वा, असंजए भिक्खुपडियाए, उक्कुज्जिय अवउज्जिय ओहरिय, आह१, दलइज्जा, तहप्पगारं असणं वा, 4 मालोहडंति णचा लाभे संते.णो पडिगाहिज्जा // 594 / / से भिक्खू वा 2 जाव समाणे से जं पुण जाणेज्जा असणं वा 4 मट्टिओलित्ते तहप्पगारं असणं वा 4 जाव लाभे संते णो पडिगाहिज्जा / केवली बूया 'आयाणमेयं' असंजए भिक्खूपडियाए मट्टिओलित्तं असणं वा 4 उभिदमाणे पुढवीकार्य समारंभिज्जा, तहा आउ-तेऊ-वाऊ-वणस्सइ-तसकायं समारंभिज्जा पुणरवि ओलिंपमाणे पच्छाकम्मं करिज्जा / अह भिक्खूणं पुव्वोवदिट्ठा जाव ज तहप्पगारं मट्टिओलित्तं असणं वा, 4 लाभे संते णो पडिगाहिज्जा // 595 //
