________________ . पण्णवणासुत्तं प० 2 349 गोसीससरसरत्तचंदणदद्दरदिण्णपंचंगुलितला, उवचियचंदणकलसा, चंदणघडसुकयतोरणपडिदुवारदेसभागा, आसत्तोसत्तविउलवटेवग्धारियमल्लदामकलावा, पंचवण्णसरससुरहिमुक्कपुष्फपुंजोवयारकलिया, कालागरुपवरकुंदुरुक्कतुरुक्कधूवमघमघंतगंधुडुयाभिरामा, सुगंधवरगंधिया, गंधवटिभूया, अच्छरगणसंघसंविकिण्णा, दिव्वतुडियसद्दसंपणइया, पडागमालाउलाभिरामा, सव्वरयणामया, अच्छा, सण्हा, लण्हा, घट्ठा, मट्ठा, णीरया, णिम्मला, णिप्पंका, णिकंकडच्छाया, सप्पहा, सस्सिरीया, समरीइया, सउज्जोया, पासाईया, दरिसणिजा, अभिरूवा, पडिरूवा। एत्थ णं वाणमंतराणं देवाणं पजत्तापजत्ताणं ठाणा पण्णत्ता / तिसु वि लोयस्स असंखेजइभागे / तत्थ णं बहवे वाणमंतरा देवा परिवसंति / तंजहा-पिसाया, भूया, जक्खा, रक्खसा, किंणरा, किंपुरिसा, भुयगवइणो महाकाया, गंधव्वगणा य णिउणगंधव्वगीयरइणो, अणवण्णिय-पणवण्णिय-इसिवाइय-भूयवाइय-कंदिय-महाकं दिया य कुहंडपयंगदेवा चंचलचलचवलचित्तकीलणदवप्पिया महिरहसियगीयणच्चणरई वणमालामेलमउडकुंडल-सच्छंदविउव्वियाभरणचारुभूसणधरा सव्वोउयसुरभिकुसुमसुरइयपलंबसोहंतकंतविहसंतचित्तवणमालरइयवच्छा, कामगमा [कामकामा], कामरूवदेहधारी णाणाविहवण्णरागवरवत्थविचित्तचिल्ललगणियंसणा, विविहदेसिणेवत्थगहियवेसा पमुइयकंदप्प-कलह-केलि-कोलाहलप्पिया हासबोलबहुला असिमुग्गर-सत्तिकुंतहत्था, अणेगमणिरयणविक्हिणिज्जुत्तविचित्तचिंधगया, महिड्ढिया, महज्जुइया, महायसा, महाबला, महाणुभागा, महासुक्खा, हारविराइयवच्छा, कडयतुडियथंभियभुया, अंगय-कुंडल-मट्टगंडयलकण्णपीढधारी,विचित्तहत्थाभरणा,विचित्तमालामउलिमउडा, कल्लाणगपवरवत्थपरिहिया, कल्लाणगपवरमल्लाणुलेवणधरा, भासुरबोंदी, पलंबवणमालधरा, दिव्वेणं वण्णेणं, दिव्वेणं गंधेणं, दिव्वेणं फासेणं, दिव्वेणं संघयणेणं, दिव्वेणं संठाणेणं, दिव्वाए इड्डीए, दिव्वाए जुईए, दिव्वाए पभाए, दिव्वाए छायाए, दिव्वाए अच्चीए, दिव्वेणं तेएणं; दिव्वाए लेस्साए दस दिसाओ उज्जोवेमाणा, पभासेमाणा, ते णं तत्थ साणं साणं असंखेजभोमेजणयरावाससयसहस्साणं, साणं साणं सामाणियसाहसीणं, साणं साणं अग्गमहिसीणं, साणं साणं परिसाणं, साणं साणं अणीयाणं; साणं साणं अणीयाहिवईणं, साणं साणं आयरक्खदेवसाहस्सीणं, अण्णेसिं च बहूणं वाणमंतराणं देवाण य देवीण य आहेवच्चं पोरेवच्चं समित्तं भट्टित्तं महत्तरगत्तं आणाईसरसेणावच्चं कारेमाणा, पालेमाणा, महया हय
