Page Text
________________
बालब्रह्मचारी श्री नेमिनाथाय नमः
नमो नमो निम्मलदंसणस्स ॐ ह्रीं नमो पवयणस्स
४५ अनुओगदाराइं-बिइया चूलिया
[१] नाणं पंचविहं पन्नत्तं तं जहा- आभिनिबोहियनाणं सुयनाणं ओहिनाणं मणपज्जवनाणं केवलनाणं ।
[२] तत्थ चत्तारि नाणाइं ठप्पाइं ठवणिज्जाइं नो उद्दिसिज्जंति नो समुद्दिसिज्जंति नो अणुन्नविज्जंति, सुयनाणस्स उद्देसो समुद्देसो अणुन्ना अनुओगो य पवत्तइ ।
[३] जइ सुयनाणस्स उद्देसो समुद्देसो अणुन्ना अनुओगो य पवत्तइ किं अंगपविट्ठस्स उद्देसो समुद्देसो अणुन्ना अनुओगो य पवत्तइ?, किं अंगबाहिरस्स उद्देसो समुद्देसो अणुन्ना अनुओगो य पवत्तइ?, अंगपविट्ठस्स वि उद्देसो समुद्देसो अणुन्ना अनुओगो य पवत्तइ, अंगबाहिरस्स वि उद्देसो समुद्देसो अणुन्ना अनुओगो य पवत्तइ, इमं पुण पट्टवणं पडुच्च अंगबाहिरस्स उद्देसो समुद्देसो अणुन्ना अनुओगो य पवत्तइ ।
[४] जइ अंगबाहिरस्स उद्देसो समुद्देसो अणुन्ना अनुओगो य पवत्तइ किं कालियस्स उद्देसो समुद्देसो अणुन्ना अनुओगो य पवत्तइ?, उक्कालियस्स उद्देसो समुद्देसो अणुन्ना अनुओगो य पवत्तइ?, कालियस्स वि उद्देसो समुद्देसो अणुन्ना अनुओगो य पवत्तइ उक्कालियस्स वि उद्देसो समुद्देसो अणुन्ना अनुओगो य पवत्तइ, इमं पुण पट्ठवणं पडुच्च उक्कालियस्स उद्देसो जाव अनुओगो य पवत्तइ ।
[५] जइ उक्कालियस्स उद्देसो जाव अनुओगो य पवत्तइ किं आवस्सयस्स उद्देसो जाव अनुओगो य पवत्तइ? आवस्सयवतिरित्तस्स उद्देसो जाव अनुओगो य पवत्तइ? आवस्सयस्स वि उद्देसो जाव अनुओगो य पवत्तइ, आवस्सयवतिरित्तस्स वि उद्देसो जाव अनुओगो य पवत्तइ । इमं पुण पट्ठवणं पडुच्च आवस्सयस्स अनुओगो ।
[६] जइ आवस्सयस्स अनुओगो० आवस्सयण्णं किं अंग अंगाई सुयखंधो सुयखंधा अज्झयणं अज्झयणाइं उद्देसो उद्देसा? आवस्सयण्णं नो अंगं नो अंगाइं सुयखंधो नो सुयखंधा नो अज्झयणं अज्झयणाइं नो उद्देसो नो उद्देसा |
___ [७] तम्हा आवस्सयं निक्खिविस्सामि सुयं निक्खिविस्सामि खंधं निक्खिविस्सामि अज्झयणं निक्खिविस्सामि |
[८] जत्थ य जं जाणेज्जा निक्खेवं निक्खिवे निरवसेसं |
जत्थ वि य न जाणेज्जा चउक्कयं निक्खिवे तत्थ ।।
[९] से किं तं आवस्सयं ? आवस्सयं चउव्विहं पन्नत्तं तं जहा- नामावस्सयं ठवणावस्सयं दव्वावस्सयं भावावस्सयं ।
[१०] से किं तं नामावस्सयं ? नामावस्सयं- जस्स णं जीवस्स वा अजीवस्स वा जीवाण वा अजीवाण वा तदुभयस्स वा तदुभयाण वा आवस्सए त्ति नामं कज्जइ से तं नामावस्सयं ।
[११] से किं तं ठवणावस्सयं ?, ठवणावस्सयं- जंणं कठुकम्मे वा पोत्थकम्मे वा चित्तकम्मे वो लेप्पकम्मे वा गंथिमे वा वेढिमे वा पूरिमे वा संघाइमे वा अक्खे वा वराडए
[दीपरत्नसागर संशोधितः]
[2]
[४५-अनुओगदाराइं]
| SR No. | 003789 |
| Book Title | Agam 45 Anuogdaraim Beiya Chuliya Mulam PDF File |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 68 |
| Language | Prakrit |
| Classification | Book_Devnagari, Agam, Canon, Agam 45, & agam_anuyogdwar |
| File Size | 2 MB |